Iranian Culture & Art Club of Fresno
رادیو ده نگی کوردستان له ئامریکا

VOK Radio Newsletter

Name: 
Email:  
Subscribe Unsubscribe

Calendar of Events

« < November 2018 > »
M T W T F S S
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2
No events
Home arrow كه‌‌لتوری و هونه‌‌ری arrow هه‌ڤپه‌یڤینه‌ له‌گه‌ڵ به‌ڕێزعومه‌ر فاروقی، نووسه‌ر، وه‌رگێڕ، لێکۆله‌ر و مێژوونووسی دیاری کورد
هه‌ڤپه‌یڤینه‌ له‌گه‌ڵ به‌ڕێزعومه‌ر فاروقی، نووسه‌ر، وه‌رگێڕ، لێکۆله‌ر و مێژوونووسی دیاری کورد چاپ ارسال به دوست
سالا ر حیسامی، VOKRadio, Los Angeles, California, USA   

هه‌ڤپه‌یڤینه‌ له‌گه‌ڵ به‌ڕێزعومه‌ر فاروقی، نووسه‌ر، وه‌رگێڕ، لێکۆله‌ر و مێژوونووسی دیاری کورد

 

kurdish_writer_omar_faroughi_01.jpg

 

٢٩ى مانگی ئوت ٢٠١٨ ی زایینی

ئاماده‌کاری و سه‌رپه‌رشتی وتووێژه‌کان: سالار حیسامی

له‌م هه‌ڤپه‌یڤینه‌دا به‌ڕێز عومه‌ر فاروقی، نووسه‌ر، وه‌رگێڕ، لێکۆله‌ر و مێژوونووسی دیاری کورد باسی کار و به‌رهه‌مه‌کانی خۆی و له‌مپه‌ره‌کانی به‌رده‌می‌ ده‌کات.

ده‌نگی كورد له ئه‌مریكا، پڕۆژه‌یه‌کی بۆ رێزگرتن و ناساندنی زانایانی ئه‌ده‌بی، نووسه‌ران و چالاكانی بواری ئه‌ده‌ب و كولتووری كوردی له ڕوژهه‌ڵاتی كۆردستان، له‌ چوارچێوه‌ی زنجیره‌ دیمانه‌ و هه‌ڤپه‌یڤین ئاماده‌ کردووه‌، که‌ له‌ دوو مانگی "ئاگۆست و سێپته‌مبه‌ر"ی ئه‌مساڵ ٢٠١٨ي زايينى پێشکه‌شی ده‌کات. ئه‌م پڕۆژه‌یه ته‌رخان كراوه بۆ ناساندنی زیاتری زانایانی كوردی ڕوژهه‌ڵاتی كۆردستان به‌ کوردستانییانی ناوخۆ و ده‌ره‌وه‌ی وڵات‌ و هاوکات ڕێزلێنانه‌ له‌و که‌سایه‌تییه‌ زانا و بلیمه‌تانه‌ی که‌ له ناوخۆی وڵاتدا ده‌ژین و وێڕای هه‌موو كۆسپ و چه‌ڵه‌مه‌كان كه له سه‌ر ڕێگه‌یاندایه، بێ وچان هه‌وڵیان داوه خزمه‌تی كولتوور و ئه‌ده‌ب و زمانی كوردی بکه‌ن. كاڕگێڕانی ده‌نگی كورد له ئه‌مریكا به‌ مه‌به‌ستی سه‌رکه‌وتن و به‌ره‌وپێشوه‌چوونی پڕۆژه‌که‌ داوای هاوكاری و هاوفكری له هه‌موو ئه‌و که‌سایه‌تییه‌ به‌ڕێزانه‌ ده‌كه‌ن كه له‌و بوارانه‌دا كاریان كردووه. 

 

عومه‌ر فاروقی:

له‌ سه‌ر چاپی کتێبێکی مۆڵه‌ت پێ دراو له‌ کاره‌که‌م ده‌رکرام و نانی ژن و منداڵمیان بڕی

 با یه‌که‌م پرسیارمان ئه‌وه‌ بێ: وه‌ک نووسه‌ر و توێژه‌ر و لێکۆڵه‌‌رێک که‌ زیاتر له‌ بیست په‌رتووک و به‌رهه‌می خۆتان به‌ چاپ گه‌یاندووه، ده‌مانه‌وێ بزانین ئایا به‌رهه‌می چاپ نه‌کراو، یان ئامادی چاپ چیتان هه‌یه‌؟

له‌ ئێستادا چه‌ند کتێبم ئاماده‌ی چاپه‌ و چاپیشی ناکه‌ن.

زۆر جار باسی "مقه‌س به‌ده‌ستانی ئیداره‌ی چاپ"تان کردووه‌. پێده‌چێ هۆکاره‌که‌ی ئه‌وه‌ بێت که‌ ده‌سه‌ڵاتی حوکمڕان سانسۆری له‌ سه‌ر به‌رهه‌مه‌کانتان هه‌بووه‌. ئایا کتێبی واتان نووسیوه‌ که‌ چاپکردنی له‌ ئێراندا ڕێپێنه‌دراو بێت؟ 

"تاریخی هیرودت"م کردووه به کوردی و چاپیشی ناکه‌ن.

"بیره‌وه‌رییه‌کانی میرزا که‌ریم بارام به‌گی"م به ناوی "جه‌نگی جیهانی له موکریان" به زمانی کوردی ئاماده‌ی چاپ کردووه و "ئینتیشاراتی سه‌ییدیان دوو ساڵه ناردوویه‌تی بۆ وه‌رگرتنی مۆڵه‌ت و ئیداره‌ی کتێب له تاران ده‌ڵێ ئێمه نامه‌ی مۆڵه‌ت پێدانمان ناردووه‌ بو شاری ورمێ، به‌ڵام له‌ ئیرشادی ورمێ کابرایه‌ک به ناوی مه‌رامی ده‌ڵێ نه‌خێر، نه‌یانناردووه‌ و راست ناکه‌ن.

به کورتی ورمێ ته‌وقیفی کردووه. کتێبی "ئه‌وێستای زه‌ردوشت"، پێشتر له هه‌ولێر ده‌زگای ئاراس چاپی کردووه له‌ ساڵی ٢٠٠٣ پاشان ئینیتشاراتی ناجی له ئێران خوازیاری چاپی بوو، به‌ڵام وه‌زاره‌تی ئیرشاد و ئیداره‌ی ئیرشادی کوردستان له‌ سنه،‌ به ته‌له‌فۆن داوایان لێ کردم، شوێن چاپی ئه‌وێستای کوردی نه‌که‌وم و مۆڵه‌تی چاپکردنیان پێ نه‌داین. 

کام په‌رتووکتان تووشی لێپێچینه‌وه‌ی یاسایی و دادگاییکردنی کردوون؟omar_faroughi_book_01.jpg 

له‌ ساڵی ١٣٦٢ی هه‌تاوی ئینتیشاراتی "شرق" له تاران کتێبی "نگاهی به‌ تاریخ و فرهنگ کردستان" نووسینی منی چاپ کرد و مۆڵه‌تی چاپیشی هه‌بوو، به‌ڵام پاش فرۆشی ٥٠٠ به‌رگی هێزی پۆلیس که‌وتنه نێو بازاڕ و گشتیان کۆ کرده‌وه و داوای ئاماده‌بوونی خۆمیان له‌ دادگای "ئه‌وین"ی تاران کرد و به‌رپرسی ئینتیشاراتی شه‌رق و ئه‌وه‌ی دیزاینی به‌رگی کتێبه‌که‌ی کردبوو، ته‌نانه‌ت ئه‌وه‌ی لاپه‌ڕه‌کانی ڕێکخستبوو، هه‌موویان گیران و خۆم هه‌ڵاتم بۆ کێو و پاش دوو مانگ گه‌ڕامه‌وه‌ و چوومه‌ دادگای ئیداری و هه‌ر چه‌ند ماوه‌ی ٢٣ ساڵ پێشینه‌ی کارم له وه‌زاره‌تی فه‌رهه‌نگ و هونه‌ر هه‌بوو، به‌ڵام مه‌حکووم کرام به "ئینفسالی دائیم" و له‌ سه‌ر چاپی کتێبێکی مۆڵه‌ت پێ دراو له‌ کاره‌که‌م ده‌رکرام و نانی ژن و منداڵمیان بڕی، ناچار بووم به عه‌ریزه‌نووس له به ردادگای سه‌قز، که‌چی له‌وێیش گرتمیان و ماوه ی نزیک به مانگ و نیویک له ژووری تاکه‌ که‌سی له‌ گرتووخانه‌ی ئیداری ئیتلاعاتی سه‌قز به‌ند کرام، له‌ کاتی دادگاییکردنم که‌ دادوه‌ر زانی، له سه‌ر ئه‌م کتیبه له‌ کاره‌که‌م لا دراوم، ئیتر حوکمی ئازادی بۆ دام، به‌تایبه‌تی که‌ به‌رپرسانی گۆڤاری سروه له ورمێ، داوای ئازادکردنی منیان کردبوو، که‌سێک به ناوی "براده‌ر تورابی" زۆر زگی پێم سووتا و گوتبووی بۆچی ئه‌و کابرایه‌ چه‌ند جار سزا ده‌ده‌ن؟‌ 

 

ده‌گوترێ زۆربه‌ی به‌رهه‌مه‌کانتان له‌ سه‌ر حیسابی خۆتان چاپ کراوه‌ و ئه‌وه‌ش بارگرانیی ئابووری بۆتان دروست کردووه‌. ئه‌وه‌ تا چه‌ند ڕاسته‌؟ 

به‌ڵێ، به‌شێک له‌ کتێبه‌کانم ته‌نیا له‌ سه‌ر حیسابی خۆم بووه‌. بۆ نموونه‌ کتێبی "نگاهی به‌ تاریخ و فرهنگ کردستان" به‌رگی دووه‌مم له تاران و به خه‌رجی خۆم چاپ کرد. له "بانکی سادرات" قه‌رزم وه‌رگرت و ئیداره‌ی ئیرشاد مۆڵه‌تی چاپی دابوو، که‌چی پاش چاپ و بڵاوبوونه‌وه‌ی دیسان خڕیان کرده‌وه‌. زیاتر له‌ ١٣٠٠ دانه‌یان له کاتێکدا که‌ پارێزگاری پارێزگای سنه‌ ئاغای ڕه‌حیمی بوو، به‌ڕێوه‌به‌ری ئیرشادی سنه که‌ ئاغای سوبحانی بوو و به‌ ئاماده‌بوونی نوێنه‌ری "ولی فقیه" که‌ سه‌یید مووسه‌وی بوو، له حه‌وشی ئیرشادی سنه به مقه‌ستی چاپخانه، تیکه‌تیکه کرا و له‌ت و کوته‌که‌یان نارد بۆ مه‌یدانی بار بۆ ناو سندووقی میوه و حاجی ئاغا به‌همه‌ن ده‌ری و عه‌لیڕه‌زا موختاری له تاران، حوکمی ئێعدامی ئه‌و کتێبه‌یان ناردبوو بۆ سنه و جێبه‌جێ کرا، من به‌ ناچاری پاره‌م به‌ سوو هێنا، بۆ ئه‌وه‌ی بتوانم قه‌رزی بانک بده‌مه‌وه‌ و زامنه‌که‌م ڕزگار بکه‌م.  

 

دوابه‌رهه‌متان که‌ مۆڵه‌تی چاپکردنی دراوه‌ چییه‌؟   

ئیستا کتێبی "چوار مه‌قاله" که له سه‌ده‌ی پێنجی کۆچی نووسراوه و من کردوومه به کوردی، مۆڵه‌تی چاپکردنی دراوه‌ و هیوادارم بتوانم له مانگی داهاتوودا چاپی بکه‌م.

 

داموده‌زگای چاپ له‌ باشووری کوردستان تا چه‌ند هاوکارییان کردووی؟ 

 


له کوردستانی باشوور له هه‌ولێر دوو کتێبی "ئه‌وێستا" و "سرداری دانایان"یان بۆ چاپ کردووم.

له سلێمانی کتێبی "حاجی باباشێخ سه‌رۆک وه‌زیرانی کۆماری کوردستان"یان بۆ چاپ کردووم و مافی نووسینیان پێ داوم. باقی کتێبه‌کانم به خه‌رجی خۆم و به قه‌رزکردن له بانک چاپ کردووه.

سه‌یر ئه‌وه‌یه‌ زۆر که‌س که داوای پاره‌ی کتێبم لێ کردوون، قسه‌ی خراپیان پێ وتووم و پاره‌یان خواردووم. ئیتر ژیانی من ئاوه‌ها بووه‌..

 


                            *******************************************


کورته‌یه‌ک له‌ ژیاننامه‌ی مامۆستاعومه‌ر فاروقی:

 

omar_faroughi_book_02.jpg

 

نووسه‌ر، وه‌رگێر، لێکۆله‌ر و مێژوونووسی دیاری کورد عومه‌ر فاروقی، کوڕی مامۆستا مه‌لا‌ محه‌مه‌د ساڵح، له‌ رۆژی یه‌کی مانگی ڕێبه‌ندانی ساڵی ١٣٢٥ی هه‌تاوی له‌دایک بووه‌. باوکی پێنوێژ و وتاربێژی گوندی "سه‌ڵته‌ که‌ڵتوو"ی سه‌ر به‌ سه‌رشیوی سه‌قز بووه‌.


له‌ ته‌مه‌نی چوار ساڵانیدا باوکی که‌ وانه‌بێژی خانه‌قای نه‌قشبه‌ندی بووه‌ له‌ شاری سه‌قز کۆچی دوایی کردووه‌. دواتر به‌ناچار کۆچیان کردووه‌ بۆ گوندی خدر و له‌وێ‌ بووه‌ته‌ قوتابی مه‌لا سه‌عید خالدی و له‌ لای سۆفی محه‌مه‌د سادق که‌ره‌فتویی قورئان و گوڵستانی سه‌عدی خوێندووه‌. پاش دوو ساڵ به‌ خێزنی گه‌ڕاونه‌ته‌وه‌ بۆ شار سه‌قز و جگه‌ له‌ خوێندن له‌ قۆناغی سه‌ره‌تایی، شانی داوه‌ته‌ به‌ر‌ کاری قورسی کرێکاری و دواتر بڕوانامه‌ی دیپلۆمی ئه‌ده‌بیاتی وه‌رگرتووه‌ و ساڵی ١٣٤٦ ی هه‌تاوی به‌ ناچاری له‌ پێناوی دامه‌زرانی له سه ر كار ۆ ئیشى حكومى بووه‌ته‌ سه‌رباز و ئه‌و خوله‌ زۆره‌ملێییه‌ی ته‌واو کردووه‌ و هه‌ر له‌و ماوه‌یه‌دا له‌گه‌ڵ نووسه‌رانی فارس ئاشنا بووه‌ و یه‌که‌م هونراوه‌ی به زمانی فارسی له‌ ڕۆژنامه‌ی "اطلاعات" له ‌ساڵی ١٣٤٩ی هه‌تاوی بڵاو کرایه‌وه‌.


له‌ ساڵی ١٣٤٨ ی هه‌تاوی ژیانی هاوسه‌رێتی پێکهێناوه‌ و هاوکات ڕووی له‌ کاری ئه‌ده‌بی و ڕاپۆرته‌ هه‌واڵ کردووه‌ و له‌ ڕۆژنامه‌کانی تاران له‌وانه‌: " کیهان، فردوسی، جوانان، آیندگان و پیشگام" به‌رهه‌مه‌کانی بڵاو کراوه‌ته‌وه‌.


ساڵی ١٣٥٣ ی هه‌تاوی له‌ وه‌زاره‌تی فه‌رهه‌نگ وهونه‌ر دامه‌زراوه‌ و شانۆنامه‌یه‌کی به‌ ناوی "شه‌هیدی دووه‌م" بووه‌ته‌ بژارده‌ی فستیڤاڵی شانۆی ئێران و له‌ کۆتایی ساڵی ١٣٥٦ی هه‌تاوی یه‌که‌م کۆمه‌ڵه‌ شیعری به‌ زمانی فارسی به‌ ناوی "فصل سنگین غربت" بڵاو کرده‌وه‌.

هاوکات بووه‌ته‌ ئه‌ندامی کانوونی نووسه‌رانی ئێران و له‌ ساڵانی ١٣٥٧و١٣٥٨ی هه‌تاوی هونراوه‌کانی به‌ زمانی فارسی و کوردی له‌ میدیاکاندا بڵاو کردووه‌ته‌وه‌.


له‌ سه‌ر داوای مامۆستا هێمن له‌ گۆڤاری سروه‌ کاری کردووه‌ و به‌رهه‌مه‌کانی بڵاو کراونه‌ته‌وه‌. ١٥٠ وتاری مێژوویی وئه‌ده‌بی له‌ گۆڤاری "سروه‌" بڵاو کراونه‌ته‌وه‌. زیاتر له‌ بیست بابه‌تی مێژوویی له‌ گۆڤاری "ئاوێنه‌" و پتر له‌ سی وتاری له‌ گۆڤاری "مه‌هاباد" و ٧٠ وتاری له‌ "ابیدر" و٨٧ وتاری له‌ "سیروان" و سه‌دان بابه‌تی دیکه‌ی له‌ ڕۆژنامه‌ و هه‌فته‌نامه‌ و مانگنامه‌کانی ڕۆژهه‌ڵاتی کوردستان و ئێراندا بڵاو کراونه‌وته‌وه‌. له‌ ده‌یان کۆڕ و کۆبوونه‌وه‌ و سمینار و فیستیڤاڵ له‌ ڕۆژهه‌ڵات و باشووری کوردستان به‌ وتار به‌شادری کردووه‌.

به‌شێک له‌ به‌رهه‌مه‌کانیشیان ئه‌مانه‌ن:

فصل سنگین غربت - شیعر به‌ زمانی فارسی
آوازهای جنبش شعر- به‌ زمانی فارسی
بانگه واز - شیعر - به‌ زمانی کوردی
ڕێگای ژیان - به‌ زمانی کوردی
نگاهی به‌ تاریخ و فرهنگ کردستان - به‌ زمانی فارسی
یادداشتهائی از کردستان - خاطرات شیخ رئوف ضیائی.
نظری به‌ تاریخ و فرهنگ سقز.
کردستان در مسیرتاریخ به‌ روایت اسناد.
زنده باد قانون - خاطرات حاج حکیم نیلوفری از قیام مشروطیت.
وه‌رگێڕانی ئاوێستای زه‌رده‌شت بۆ زمانی کوردی.
سرداردانا بیوگرافی مصطفی بارزانی
حاجی باباشێخ سه‌رۆک وه‌زیرانی کۆماری کوردستان.
سه قز له گه‌رمه‌ی جه‌نگی جهانیدا.
پنجاه سال مبارزه در کردستان.
پنجاه مقاله در خبرگزاری بین المللی کردپرس در سنندج
نووسینی سیناریۆ و تۆمارکردنی فیلمی "گیان به‌ختکه‌ران" له‌ ته‌له‌فیزیۆنی مه‌هاباد و سنه‌.
وه‌رگێڕانی "تاریخ هرودت" بۆ سه‌ر زمانی کوردی.

هه‌روه‌ها چه‌ندین به‌رهه‌می دیکه‌یان ئاماده‌ی چاپه‌ که‌ له‌ ئێراندا ڕێگری له‌ چاپکردنیان ده‌کرێ.

 


 

 

**************************************  

vokradio.jpg

 Voice of Kurdish-American Radio for Democracy, Peace, and Freedom

 
 
 
< بعد   قبل >
© 2007 - 1397, VOK Radio