Iranian Culture & Art Club of Fresno
به صدای کوردستان از آمریکا خوش آمدید-
رادیو ده نگی کوردستان له ئامریکا
Voice of Kurdish-American Radio for Democracy, Peace and Freedom

Warning: Call-time pass-by-reference has been deprecated in /home/content/v/o/k/vokradio/html/mambots/content/joscomment.php on line 51
دروشمی "نە شیاد نە جلاد" لە هەڵبژاردنەكانی ئێراندا چاپ ارسال به دوست
سالار حیسامی vokradio, Los Angeles, California, USA   

دروشمی "نە شیاد نە جلاد" لە هەڵبژاردنەكانی ئێراندا

 salar_hisami.jpg

سالار حيسامى

١٥ ى مانگى ئاوريل ٢٠١٧ ى زايينى
هه ولير- كوردستان

لەوەتی كۆماری ئیسلامی دامەزراوە، لە یەكەم سەرۆك كۆماريەوە كە ئەبولحەسەن بەنی سەدر بوو، تا حەوتەمین سەرۆك كۆمار كە حەسەن رۆحانی –یە، لەسەردەمی حوكمڕانیی هیچ كامیاندا كار بۆ ئەوە نەكراوە كە رێژەی كوشتن و لەسێدارەدان و سەركوت و پێشێلكردنی مافەكانی مەدەنیی شارومەندان كەم بكرێتەوە.


لە ڕێبەندانی ١٣٥٨ی هەتاوی ئەبولحەسەن بەنی سەدر بووە سەركۆمار و دوای كەمتر لە یەك ساڵ و نیو، لە جۆزەردانی ١٣٦٠ بە فەرمانی ئایەتوڵا رۆحوڵا موسەوی خومەینی لەو پۆستە لادرا، دواتر لە هەڵبژاردنی سەرۆك كۆماریدا محەمەد عەلی ڕەجایی كە سەرۆك وەزیرانی سەرۆك كۆمار بوو، بووە سەرۆك كۆماری ئێران و دەوڵەتیش بە هەموو توانایەوە سەرقاڵی پاكتاوكردنی نەیارانی بوو، پیلان و پلانەكانیشیان لە سنووری تیرۆری ناوخۆیی بەرەو تیرۆری دەرەكی تێپەڕیبوو،(سازمان مجاهدین خەلق)یش كاری هاوشێوەی كرد و بە چاندنی بۆمب لە هۆڵی كۆبوونەوەكانی سەرۆك وەزیراندا لە ٨ی خەرمانانی ١٣٦٠ كۆتایی بە ژیانی ڕەجایی و ژمارەیەك لە كاربەدەستانی هاوكاری هێناو بەمجۆرە تەمەنی سەرۆك كۆماری نوێ مانگێكی پڕ نەكردەوە.


سەید عەلی خامنەیی لە ڕەزبەری ١٣٦٠ لە سیناریۆی هەڵبژاردنێكی دیكەدا كاتێ حوكمی سەرۆك كۆماری لە دەستی ئایەتوڵا رۆحوڵا خومەینی وەرگرت، كە لە سەر چورابەن(كورسی)ێك دانیشتبوو، election1396iran.jpgبەسەر دەستیدا چەمایەوەو بە(ركوع) و دەست ماچ كردنێك توانی یەكەم سەرۆك كۆماری ئێران بێ، كە بۆ ماوەی دوو خول لەو پۆستەدا بمێنێتەوە. ئەو هەشت ساڵە كە هاوكات بوو لەگەڵ (شەڕی ئێران و عێراق) ساڵانی پەرەسەندنی به كۆمه ل كوژیی زیندانیانی سیاسی و تیرۆری نەیارانی كۆماری ئیسلامی لە ناوخۆ و دەرەوەدا بوو.


لە دوای كۆچی دوایی ئایەتوڵا رۆحوڵا خومەینی، حوجەتولئیسلام عەلی خامنەیی لە پڕ كرا بە ئایەتوڵا و بە پشتیوانیی ئەكبەر هاشمی رەفسەنجانی بووە رێبەری ئایینی ئیران و رەفسەنجانی بە بێ دەستماچكردن حوكمی سەرۆك كۆماری ئێرانی لە هاوتاكەی وەرگرت، پۆستی سەرۆك وەزیران-یش لادرا. رەفسەنجانی بۆ ماوەی دوو خول (١٣٦٨ – ١٣٧٦) خاوەندارێتی ئەو پۆستەی كرد و لە میدیای ئێرانیدا كابینەكەی بە(دولت سازندگی) و خۆیشی بە(سردار سازندگی) ناو دەبردرا.
گەلانی ئێران لە پلاتفۆرمی سیاسی و كارنامەی رەشی(ولی فقیە) و باڵی توندئاژووی سەر بە خامنەیی بێزار ببوون، بۆیە بە ناچاری هیوایان لە سەر یاڵی میانڕۆ هەڵچنی و ڕەفسەنجانی زیاتر لە ١٥ ملیۆن دەنگ و خاتەمی پتر لە ٢٠ ملیۆن دەنگ و ڕۆحانی ١٨ ملیۆن دەنگی دەنگدەرانیان دەستەبەر كرد.


محەمەد خاتەمی بە دروشمی جۆراوجۆر و بانگەشەی كرانەوە لە بواری دیپلۆماسیی نێودەوڵەتی و سەردانی شارە سوننەنشینەكان و وتاردانی لە مزگەوتەكانی(عومەری كوڕی خەتاب) و زۆر گەمەی دیماگوژییانەی سیاسی، گەلانی نائومێد لە حوكمڕانانی ئێرانی هێنایەوە بەردەم سندووقەكانی دەنگدان و لە واقیعدا پتر لە ٢٠ ملیۆن دەنگی دەنگدەرانی ناڕازی لە دەسەڵاتی كۆكردەوە، تەنانەت ژمارەیەك حزب و چەندین كەسایەتیی بەرهەڵستكاری ئێرانیش هاندەری بەشداریكردن لەو هەڵبژاردنەدا بوون، كە بۆ ماوەی دوو خول (١٣٧٦ – ١٣٨٤) پۆستی سەرۆك كۆماری پێشكەشی خاتەمی كرد، بەڵام لەو ماوەیەدا نەك هیچ ریفۆرمێك بەدی نەكرا، بگرە سەركوت و كوشتن و لەسێدارەدان هەڵكشان و پەروەردەكردنی تیرۆریستان و ئامادەكردنیان بۆ شەڕی بەوەكالەت چڕتر بوون و بوونە نەقشەڕێگەی سەرۆك كۆماری داهاتوو، بەمجۆرە مەحموود ئەحمەدی نەژاد لە ژێر باڵی خامنەیی-ـەوە هاتەدەرێ و بە دزینی دەنگی دەنگدەران و دەستكاریكردنی سندووقەكانی دەنگدان بووە شەشەمین سەرۆك كۆماری ئێران و بۆ ماوەی دوو خول (١٣٨٤ – ١٣٩٢) دەستی بەسەر ئەو پۆستەدا گرت. لە ئاكامی ئەو ڕادزینە (بزافی سەوز) لەدایك بوو، لە چەندین شاری گەورەی ئیراندا خۆپیشاندانی چەند میلۆن كەسی ئەنجام درا، كە بە دڕندانەترین شێوازەكان و بەپەلە سەركوت كران، پێكدادانەكانیش قوربانیی زۆری لێكەوتەوە.


ئەحمەدی نەژاد لە كاتی وەرگرتنی یەكەم حوكمی سەرۆك كۆماریی خۆیدا تا نێوقەدی بەسەر دەستی خامنەیی-دا چەمایەوەو دەستی ماچ كرد، بەڵام لە خولی دووەمدا تەنیا بە ماچكردنی شانی(ولی فقیە) پەسەندەی كرد، غروورەكەشی ڕەنگە بە هۆی ئەوە بێ، شان بە شانی خامنەیی لە سەر ئەو پڕۆژەیە كاری كردووە كە هیلالی شیعە بەرفراوانتر بكرێ و تیرۆریست و میلیشیای جۆراوجۆر شەڕی بەوەكالەتیان بۆ بكەن.


ئەو دروشمە قەبەیانەی كە ئەحمەدی نەژاد لە بانگەشەكانی هەڵبژاردن دووپاتی دەكردەوە: "نەوت دێنینە سەر سفرەی هاووڵاتیان و ڕووبەڕووی ئەشرافیگەری دەبینەوە و دادپەروەری دەچەسپێنین و..." وەك دروشمەكانی حەسەن ڕۆحانی و (كلیل)ـەكەی مایەپووچ دەرچوون. ئەو كلیلەی كە ڕۆحانی خۆی بە خاوەنی دەزانێ و بانگەشەی ئەوەی بۆ دەكرد كە دەكارێ هەموو قفڵ و گرێیەكی سیاسی و ئابووری پێ بكاتەوە، تەنیا دەرگای خافڵاندنی كۆشكی سپی (لە كاتی ئیدارەی باراك ئۆباما) كردەوە، سەرۆكی نوێی ئەمریكا(دۆناڵد ترەمپ) لەگەڵ تیرۆر و تیرۆریستپەروەران سازش ناكا و سەری مارەكەی(ولی فقیە) مەبەستە و بە پێوەنانی ٥٩ سارۆخ بە كلكی مارەكەوە (بەشار ئەسەد) هاوكێشە و بژارەكانی بەردەمی وردبینانەتر تاوتوێ دەكا.


حەسەن ڕۆحانی حەوتەمین سەرۆك كۆماری ئێرانە و تەمەنی كۆتایی پۆستەكەی زیاتر لە وەرزی ساڵێكی نەماوە. گەلانی ئێران بەگشتی و ڕۆژهەڵاتی كوردستان بەتایبەتی حەوت خانی ڕۆستەم-یان بڕی و جگە لە دروشمی بابردەڵەی دەسەڵاتی حوكمڕان و نەهامەتییەكانی خۆیان هیچیان بەدی نەكردووە. ئێستا تەمەنی كۆماری ئیسلامی ئێران خەریكە چوار دەیە پڕدەكاتەوەو ئەو دەسەڵاتە ئایینی سیاسییە بۆ ئەنجامدانی ١٢یەمین خولی هەڵبژاردنی سەرۆك كۆماری ئامادەكاری دەكا كە لە كۆتایی مانگی گوڵان-ی ئەمساڵدا ئەنجام دەدرێ.. سیناریۆی شانۆی ئەم هەڵبژاردنە لە ئێستاوە دەخوێندرێتەوە و دیارە كە دەوڵەتی حوكمڕان چۆن و بە چ رێكارگەلێ خەڵك پەلكێشی بەردەم سندووقەكانی دەنگدان دەكا، بەڵام ڕێبەری لە یاسا و دەوڵەت گەورەتر لەوە خافڵە كە زۆرینەیەكی نزیك بە گشتیی دانیشتووانی ئێران ڕایانوایە بە درێژایی تەمەنی (ولی فقیە)، سەرۆك كۆماری جەللاد(سەربە باڵی تونداژووی پاوانخواز) یان شەییاد (سەربە باڵی میانڕۆ و ریفۆرمخواز)یان بووە، كە هەر هەموویان ئاویان بۆ ئاشێ بردووە! بۆیە كۆدەنگییەك دروست بووە و دروشمی (نە شیاد نە جلاد)ی لێكەوتووەتەوە.

لە كۆتاييدا ئەم پرسیارە دروست دەبێ:

ئایا چەند سەرۆك كۆماری شەییاد و جەللادی دیكە دەبینین؟ بێگومان داهاتوویەكی نزیك وەڵامی ئەم پرسیارە دەداتەوە.

**************************************

 

 

vokradio.jpg

 Voice of Kurdish-American Radio for Democracy, Peace, and Freedom

 
free stats

 

 

 
< بعد   قبل >

Polls

VOK Radio Newsletter

Name: 
Email:  
Subscribe Unsubscribe

Calendar of Events

« < June 2017 > »
M T W T F S S
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2
© 2007 - 1396, VOK Radio