Iranian Culture & Art Club of Fresno
رادیو ده نگی کوردستان له ئامریکا

VOK Radio Newsletter

Name: 
Email:  
Subscribe Unsubscribe

Calendar of Events

« < July 2017 > »
M T W T F S S
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
No events
Home arrow هه‌رێمه كوردییه‌‌كان arrow زنجیرە وتووێژێك لەگەڵ ١٢حيزب ولایەنی سیاسیی ڕۆژهەڵات:رێكخراوی كوردستانی حيزبی‌ كۆمۆنیستی‌ ئێران .

Warning: Call-time pass-by-reference has been deprecated in /home/content/v/o/k/vokradio/html/mambots/content/joscomment.php on line 51
زنجیرە وتووێژێك لەگەڵ ١٢حيزب ولایەنی سیاسیی ڕۆژهەڵات:رێكخراوی كوردستانی حيزبی‌ كۆمۆنیستی‌ ئێران . چاپ ارسال به دوست
سالار حیسامی vokradio, Los Angeles, California, USA   

  زنجیرە وتووێژێك لەگەڵ ١٢حيزب و لایەنی سیاسیی ڕۆژهەڵاتی كوردستان

   به شى پنجم :

رێكخراوی كوردستانی حيزبی‌ كۆمۆنیستی‌ ئێران- كۆمەڵە

 

kurdish_united_front_05.jpg

ئیبراهیم عه‌لیزاده‌ سكرتێری‌ رێكخراوی كوردستانی حيزبی‌ كۆمۆنیستی‌ ئێران- كۆمەڵە

پيشه كى:

ئاماده كارى و سه رپه ره شتى وتوويژه كان: سالار حیسامی

ڕادیۆ دەنگی كوردستان لە ئەمریكا، زنجیرە وتووێژێكی لەگەڵ دوازدە حيزب و لایەنی سیاسیی ڕۆژهەڵاتی كوردستان لەبارەی رەوتی گۆڕانكارییەكان لەڕۆژهەڵاتی ناوەڕاست و هاوكێشە سیاسییەكانی ناوچەكەو جیهان و كاردانەوەیان لەسەر ئێران، هەروەها سەرهەڵدانەوەی خەباتی چەكداری لە رۆژهەڵاتی كوردستان و پێگەی كورد لە هەنگاونانی بەرەو سەربەخۆیی و چەند تەوەرێكی دیكە ئەنجام داوە، كە لەماڵپەڕی ڕادیۆ دەنگی كوردستان لەئەمریكا، (بەڕەچاوكردنی پێوەری بێلایەنی پیشەیی) بەپێی پیتی(ئەلف بێ)ی ناوی حيزبە بەشداربووەكان بڵاودەكرێنەوە، هەر لایەنێكیش دواتر وەڵامی پرسیارەكان بداتەوە، هەر لە ریزی ئەو زنجیرە وتووێژەدا دادەنرێ.

پێویستە خوێنەرانی بەڕێز ئاگادار بكەینەوە كە ئەم زنجیرە وتووێژە لەپێش بەڕێوەچوونی شەشەمین دیداری ئەنیستیتوتی رۆژهەڵاتی ناوەڕاست بۆ توێژینەوە(مێری) لەهەولێر ئەنجام دراوەو ئەو لایەنانەش كە لەو پانێلانەدا بەشدار نەبوون، لەم زنجیرە وتووێژەدا بەشدار كراون.

  iranian_kurds_12organizations.jpg

بێگومان ڕۆژهەڵاتی ناوەڕاست لەدۆخێکی ئاڵۆزو پڕكێشەی ئەوتۆدایە كە ئەگەری گۆڕانکاری لەئایندەی ناوچەكەدا پتربووە، ئەوەش نكۆڵی لێ ناكرێ كە ملمڵانێی ناڕەوای ئایینی و مەزهەبی بووەتە هۆی پەرەسەندنی توندڕەوەی و تیرۆریزم، بەجۆرێك كە دەرگای بۆ دەستوەردانی دەرەكی لەئاستی وڵاتانی ناوچەیی و زلهێزانی جیهاندا كردووەتەوە، كوردیش لەو گۆڕانكارییانەدا پشكی شێری بەردەكەوێ. بۆیە بەلەبەرچاوگرتنی هەوڵدان بۆ یەكڕیزی لەپێناوی بەرژەوەندیی باڵای نەتەوەیی، تەوەری سەرەكیی وتووێژەكانمان لەبارەی زەروورەتی پێكهێنانی بەرە، یان هێزێكی هاوبەش و هەماهەنگیكار بووە بۆ ڕۆژهەڵاتی كوردستان و هەوڵدراوە كۆسپەكانی بەردەم ئەو هەنگاوە پێویستە تاوتوێ بكرێ. لەوانەشە زۆر كەس گەورەیی و مێژووی ڕابردووی خەبات و قوربانیدانی لایەنەكان بەلایانەوە پێوەر بێ، ئێمەش وەك چاودێر و میدیاكار، شرۆڤەی تایبەت و بابەتییانەمان بۆ قورسایی هەر لایەنێك هەیە، بەڵام ئەركی پیشەیی ناچارمان دەكا، هیچ لایەن و حزبێ نادیدە نەگرین، ئەوەشی وا دوابڕیاردەرە كە كام لایەن جەماوەریترە، ئیرادەی گەلی كوردستانەو ئەو بڕیارە بۆ هاووڵاتییانی كوردستانی بەجێدەهێڵین.

  هیوادارین ئەركی خۆمان وەك میدیاكاری بێلایەن بەباشی جێبەجێ كردبێ.

ریزبەندیی بەشداربووانی بەڕێز:

 

١- بزووتنەوەی کۆماریخوازانی رۆژهەڵاتی کوردستان
٢- پارتی ئازادیی كوردستان
٣-پارتی ژیانی ئازادی كوردستان '
٤- پارتی سەربەستیی کوردستان
٥- پارتی لیبڕاڵ دیموكراتی كوردستان
٦-حيزبی دیموكراتی كوردستان (هێشتا وەڵامی نەداوەتەوە)
٧-حيزبی دیموكراتی كوردستانی ئێران(هێشتا وەڵامی نەداوەتەوە)
٨- رێكخراوی كوردستانی حزبی‌ كۆمۆنیستی‌ ئێران- كۆمەڵە
٩- سازمانی خەباتی كوردستانی ئێران
١٠- كۆمەڵەی زەحمەتكێشانی كوردستان
١١-کۆمەڵەی زەحمەتکێشانی کوردسـتانی ئێران (هێشتا وەڵامی نەداوەتەوە)
١٢- یەكێتی شۆڕشگێڕانی كوردستان 


ئیبراهیم عه‌لیزاده‌ سكرتێری‌ رێكخراوی كوردستانی حيزبی‌ كۆمۆنیستی‌ ئێران - كۆمەڵە

 
* پرسیاری یەكەممان با ئەوە بێت، ماوەیەكە لە رۆژهەڵاتی كوردستان خەباتی چەكداری سەری هەڵداوەتەوە و ئەو شێوازی خەباتەش خوێندنەوەى جیاوازی بۆ دەكرێ، بەتایبەتی لەم دۆخەدا كە رۆژهەڵاتی ناوین بەرەو گۆڕانكاریى ژیوپۆلۆتیكی هەنگاو هەڵدەگرێ، هەڵوێستی ئێوە لەو بارەیەوە چییە؟


** ئه‌وه‌ی ئێوه‌ باسی ده‌كه‌ن هێشتا ناتوانێ به‌واتای سه‌رهه‌ڵدانه‌وه‌ی خه‌باتی چه‌كداری له ‌ڕۆژهه‌ڵاتی كوردستان بێت. حه‌ڕه‌كه‌تێكی كه‌م ده‌وامه‌ كه‌ نه‌ بارودۆخی سیاسيی ناوه‌وه‌ی وڵات بۆ په‌ڕه‌سه‌ندنی له‌باره‌ و نه‌ هێزێك كه‌ ده‌ستی بۆ ئه‌وه‌ حه‌ره‌كه‌ته‌ بردووه‌، به ‌ئه‌ندازه‌ی كافی ئاماده‌كاری بۆ كردووه‌. ئێمه‌ له‌گه‌ڵ ده‌ربڕینی ته‌ئه‌سوفمان بۆ زه‌ره‌ر و زیانێك كه‌ حیزبی دیموكراتی كوردستانی ئێران له‌م بابه‌ته‌وه‌ دیتوویه‌تی، وه‌كوو یه‌ك سیاسه‌تی دیاریكراو، ته‌ئیدی ناكه‌ین. له‌گه‌ڵ ئه‌وه‌شدا ئێمه‌ سیاسه‌تێكی راگه‌یاندراومان به‌ڕانبه‌ر به ‌خه‌باتی چه‌كداری هه‌یه‌. ئێمه‌ پێمانوایه‌ له‌ بارودۆخێكدا كه‌ رژیمی كۆماری ئیسلامی بۆ سه‌ركوتی سه‌ره‌تاییترین ماف و ئازادیيه‌كانی خه‌ڵك، ده‌ست بۆ له‌شكركێشی و زیندان و ئه‌شكه‌نجه‌ و ئیعدام ده‌بات و رێگا له‌ هه‌ر چه‌شنه‌ خه‌باتێكی مه‌ده‌نی و سیاسی و هێمنانه‌ی خه‌ڵكی كوردستان ده‌گرێت، ئه‌وه‌ مافی ره‌وای ئه‌و خه‌ڵكه‌یه‌ كه‌ بۆ دیفاع له‌ خۆی و له‌ كه‌رامه‌تی ئینسانی  خۆی و به‌ده‌ستهێنانی مافی زه‌وتكراوی خۆی ده‌ست بۆ چه‌ك به‌رێت. به‌ڵام خه‌باتی چه‌كداری ئالترناتیڤی خه‌باتی مه‌ده‌نی نییه‌، خه‌باتی پێشمه‌رگه‌ی كۆمه‌ڵه‌ به‌ پێی رێباز و سیاسه‌تێك كه‌ به‌ڕێوه‌ی ده‌بات، جه‌ماوه‌ری خه‌ڵك بێ وه‌زیفه‌ و چاوه‌ڕوانی سه‌ركه‌وتنی نیزامی خۆی راناگرێ، به‌ڵكوو بڕوا به‌ هێزی خۆیانیان تێدا گه‌شه‌ پێده‌دات. به‌رنامه‌ و تاكتیكی نیزامی خوی به‌ هه‌ڵسه‌نگاندنی كۆنكرێت له‌ هه‌ل و مه‌رجی خه‌باتی جه‌ماوه‌ری و پێویستییه كانی ئه‌و خه‌باته‌وه‌ گرێ ده‌دات. به‌ پشت به‌ستن به‌وه‌ سه‌ره‌تایه‌ كه‌ باسكرا، ئیمه‌ ‌له‌سه‌ر پاراستنی باسكی چه‌كداری خۆمان پێداگری ده‌كه‌ین. له‌قه‌ده‌ر تواناییه‌كان و ئێمكاناتی ئه‌م ده‌وره‌یه‌ په‌ره‌ی پێ ده‌ده‌ین و مه‌شق و ڕاهێنانی پێویستی پێ ده‌كه‌ین.

به‌بووچۆنی ئێمه‌ ئه‌و شێوه‌یه‌ له‌ خه‌بات، له‌ كوردستانی ئیران و له‌ هه‌موو پارچه‌كانی كوردستان، هه‌تا هاتووه‌ ره‌وابوون و پێویستی خۆی زیاتر نیشان داوه‌. به‌ڵام چالاكیی ئه‌و هێزه‌ له‌ ناوه‌وه‌ی وڵات، له‌ رووی هه‌ڵسه‌نگاندنی كۆنكرێت سه‌باره‌ت به ‌پێویستی، ئیمكانات و بارودۆخی بزووتنه‌وه‌ی خه‌ڵكی كورد له‌ڕۆژهه‌ڵاتی كوردستان به‌ گشتی و له‌ هه‌موو بواره‌كانیدا به‌ڕێوه‌ ده‌چێت. ئه‌و بزووتنه‌وه‌یه‌ ته‌نیا خۆی له‌خه‌باتی چه‌كداریدا نابینێته‌وه‌. ئه‌وه‌ هێزه‌ئاماده‌ی خۆی راده‌گرێت، به‌ڵام كه‌ی و چۆن و له‌ كوێ به‌ كاری دێنێت پێوه‌ندی هه‌یه‌ به‌ لێكدانه‌وه‌ی ئیمه‌ له‌ بارودۆخی سیاسی. ئیستا ئه‌و بارودۆخه‌ بۆ وه‌ها حه‌ره‌كه‌یه‌ك له‌بار نییه‌. كاتێك ئێمه‌ خه‌باتی چه‌كداریمان له رۆژهه‌ڵاتی كوردستان ده‌ست پێكرد، شاره‌كانی كوردستان ئازاد بوون، به‌موقاوه‌مه‌تی چه‌كدارانه‌ ئه‌وه‌نده‌ی كه ‌توانیمان به‌رگریمان له‌ ده‌ستكه‌وته‌كانی ئه‌و بزووتنه‌وه‌یه‌ كرد. به‌ڵام دیاره‌ هه‌م خه‌باتی چه‌كداری و هه‌م خه‌باتی مه‌ده‌نی و جه‌ماوه‌ری پاشه‌كشه‌ی پێ كرا. ئێمه‌ نامانهه‌وێ له‌و جێگایه‌وه‌ كه‌ كۆتایی پێ هاتووه‌، له‌وێوه‌ ده‌ست پێ بكه‌ینه‌وه‌. ئێمه‌ هه‌وڵ ده‌ده‌ین به‌پێی پێویستییه‌كانی خه‌باتی جه‌ماوه‌ری و بۆ نزیككردنه‌وه‌ی سه‌ركه‌وتنی ئه‌و خه‌باته‌، له‌كات و شوێنی گۆنجاوه‌وه‌ ده‌ست پێ بكه‌ینه‌وه‌. هێزێكی چه‌‌كدار كه‌ چه‌كی به‌ شانه‌وه‌یه‌ به‌ واتای ئه‌وه‌یه‌ كه‌ هه‌میشه‌ ئاماده‌ی نه‌به‌رده‌،‌ به‌ڵام به‌ واتای ئه‌وه‌ نییه‌ كه‌ به‌رده‌وامیش به‌ كرده‌وه‌ له‌ حاڵی نه‌بەرددایه‌.

دیاریكردنی زه‌مان و مه‌كان و مه‌یدانی نه‌به‌ردی پێشمه‌رگانه‌ پێوه‌ندی به‌ لێكدانه‌وه‌ی موشه‌خه‌س له‌ بارودۆخی سیاسییه‌وه‌ هه‌یه‌. به‌كارهێنانی هێز، له‌كات و شوێنی نه‌گونجاو، ده‌رفه‌تێكه‌ بۆ دوژمن نه‌ك بۆ هێزی پێشمه‌رگه‌. ئیمه‌ بۆمان نییه‌ به‌ فه‌راموشكردنی ئه‌زموونی ده‌وڵه‌مه‌ندی خه‌باتی خه‌ڵكی كوردستان ئه‌و جۆره‌ ده‌رفه‌تانه‌ بۆ دۆژمن بخۆلقێنین. به‌ هۆی بارودۆخی سیاسی له‌ ئیران و له‌ هه‌رێمی كوردستان، ئه‌و هێزه‌ له‌ ئێستادا به‌ پێی سیاسه‌تێكی دیاریكراو چالاكیی نیزامی له‌ دژی هێزه‌كانی كۆماری ئیسلامی به‌ڕێوه نابات. ئه‌و سیاسه‌ته‌ له‌ لایه‌كه‌وه‌ له‌ ناوه‌وه‌ی وڵات  پێوه‌ندی  به‌و بۆچوونه‌وه‌ هه‌یه‌ كه‌ له‌ سه‌ره‌تادا باسكرا، له‌لایه‌كی دیكه‌وه، له‌ ده‌ره‌وه‌ی سنووره‌كانی كوردستانی ئیران،‌ پێوه‌ندی هه‌یه‌ به‌وه‌ كه‌ خه‌باتی چه‌كداریی ئیمه‌ نابێ ژانه‌سه‌ر بۆ خه‌ڵكێك دروست بكات كه‌ خۆیان به‌ هیچ شێوه‌یه‌ك له‌ شێوه‌كان له وه‌ها بڕیارێكدا به‌شدار نین. له‌ حاڵێكدا حه‌ره‌كه‌تی چه‌كدارانه‌ی ئیمه‌ بژارده‌ی خه‌ڵكه‌كه‌ی و ده‌سه‌ڵاته‌كه‌ی نییه‌، ئیمه‌ سنووره‌كانی هه‌رێمی كوردستان بۆ خه‌باتی پێشمه‌رگانه‌ بەكار ناهێنین. ئه‌گه‌ر رۆژێك له‌ رۆژان خاكی هه‌رێمی كوردوستان و سنووره‌كانی بۆ خه‌باتی چه‌كداری به‌ كار بێت،‌ قاعیده‌ته‌ن به‌ بێ جۆرێك له‌ رێككه‌وتن ناكرێت.


* ڕایەك هەیە پێداگری لەوە دەكا، كە لە بەشێكی باشووری كوردستان جۆرێك لە سانسۆری هەواڵەكانی رۆژهەڵاتی كوردستان بەدی دەكرێ، لە بەشێكی دیكەشی بایەخی تەواوی پێ دەدەن، چ خوێندنەوەیەكتان بۆ ئەو ڕایە هەیە؟

 

** ئه‌وه‌ ڕاستییه‌‌كه‌ كه‌ ده‌بیندرێ. به‌داخه‌وه‌ سیاسه‌تی راگه‌یاندنی حیزبه‌ سیاسییه‌كانی باشووری كوردستان له‌ژێر كاریگه‌ری پێوه‌ندی دیپلۆماسی ئه‌و حیزبانه‌ له‌گه‌ڵ ده‌وڵه‌تانی دراوسێدایه.‌ ئێمه‌ پێوه‌ندی ئه‌و حیزبانه‌ له‌گه‌ڵ ئه‌و ده‌وڵه‌تانه‌ ده‌رك ده‌كه‌ین و لامان وایه‌ ئه‌م پێوه‌ندییانه‌ ده‌كرێت له‌سه‌ر بنه‌مایێكی ئوسوولی دابمه‌زرێت و زه‌رەر‌ به‌ خه‌باتی ڕه‌وای گه‌ڵی كورد له‌هیچكام له‌پارچه‌كانی كوردستان نه‌گه‌یه‌نێت. به‌هێزبوونی ئیمه‌ نه‌ك هه‌ر به‌ زه‌ره‌ری دیپلۆماسی هه‌رێمی كوردستان، به‌ حیزبه‌كانیشیه‌وه‌ له‌گه‌ڵ كۆماری ئیسلامی نییه‌، به‌ڵكوو به‌پێی هاوسه‌نگیی هێز ده‌توانێ بارودۆخێكی له‌بارتر بۆ ئه‌و دیپلۆماسییه‌ بڕه‌خسێنێ. سانسۆری هه‌واڵه‌كان به‌ لای ده‌وڵه‌تانی دراوسێوه‌ به‌ خاڵی زه‌عف بۆیان ده‌نووسرێ نه‌ك خاڵی به‌هێز. هه‌ر ئێستا ئۆپۆزیسیۆنی كۆماری ئێسلامی ئێران له‌گه‌لێك له‌وڵاتانی دونیا چالاكییان هه‌یه‌، به‌بێ ئه‌وه‌ی پێوه‌ندیی دیپلۆماسیی ئه‌و  وڵاتانه‌ و كۆماری ئێسلامی شێواندبێت. ئه‌وه‌ش با بمێنێت كه‌ كوردی هه‌ر دوو به‌ش نه‌ته‌وه‌یەكن و پێوه‌ندییه‌كانی ئه‌م دوو به‌شه‌ له ‌نسكۆیە‌كان و له‌سه‌ركه‌وتنه‌كاندا مێژووی خۆی هه‌یه‌.


* پێوەندییەكانی كوردی ڕۆژهەڵاتی كوردستان و ئۆپۆزیسیۆنی ئێرانی چۆنە و ئایا ئەو ئەزموونەی باشووری كوردستانتان لەبەرچاو گرتووە كە كاتی خۆی لەگەڵ حزبە عێراقییەكان لە دژی حكومەتی بەعس لە بەرەیەكدا بوون و ئێستا هەر ئەوان بودجە و مووچەی خەڵكی كوردستانیان بڕیوە؟


** هه‌ر حیزبه‌ی به‌ پێی ستراتێژ و رێباز و سیاسه‌تی خۆی هه‌وڵیداوه‌ هاوپه‌یمانی سه‌ر‌اسه‌ری خۆی ده‌ستنیشان بكات. ڕاستییه‌كی حاشاهه‌ڵنه‌گر ئه‌وه‌یه‌ كه‌ به‌بێ گۆڕێنی بنه‌ڕه‌تیی ده‌سه‌ڵات له‌تاران چاوه‌ڕوان ناكرێ كه‌ مافه‌كانی گه‌ڵی كورد له‌كوردستانی ئێران دابین بكرێت. ئه‌وه‌ ئه‌زموونی هه‌موو به‌شه‌كانی دیكه‌ی كوردستانیشه‌. كاتێك كه‌ سه‌دام حوسین له‌به‌غدا گڵوڵه‌ی كه‌وته‌ لێژی، ده‌رفه‌تی ئه‌ساسی بۆ حیزبه‌ سیاسییه‌كانی كوردستانی باشوور ڕه‌خسا. كوردی ڕۆژئاوا له‌ئاكامی ئه‌زمه‌ی سه‌رتاسه‌ری له‌سوریه‌ ده‌رفه‌تی بۆ ڕه‌خسا، بزووتنه‌وه‌ی به‌رینی جه‌ماوه‌ری له‌كوردستانی باكوور به‌بێ گۆڕێنی هاوسه‌نگی هیز له‌ئاستی سه‌رتاسه‌ریدا له‌توركیا به‌قازانجی به‌ره‌ی دیموكراسی نه‌ده‌كه‌وته‌ ڕێ. كه‌وایه‌ ئه‌گه‌ر ئێمه‌ نه‌مانهه‌وێت چاوه‌ڕۆانی ده‌ستتێوه‌ردانی ده‌ره‌كی، كۆدتا و یا هه‌ر ڕووداوێكی كتوپڕ له‌تاران بێن، پێویسته‌ پلانی خۆمان له‌گه‌ڵ پلانی سه‌ڕاسه‌ری بۆ ڕووخاندنی كۆماری ئێسلامی هاوئاهه‌نگ بكه‌ین. بۆ ئه‌م مه‌به‌سته‌ پێویسته‌ هاوپه‌یمانانی سه‌ڕاسه‌ری خۆمان بناسین و لێیان نزیك ببینه‌وه‌. بۆ نموونه‌ ئێمه‌ وه‌كوو ڕێكخراوێكی چه‌پ خۆمان له‌حه‌ڕه‌كه‌ی چه‌پی سه‌ڕاسه‌ری له‌ئێران به‌نزیك ده‌زانین. ئه‌و حه‌ڕه‌كه‌یه‌ش هه‌ر له‌ئێستاوه‌ پێویسته‌ دان به‌ مافی دیاریكردنی چاره‌نووس به‌واتای مافی جیابوونه‌وه‌ و پێكهێنانی ده‌وڵه‌تی سه‌ربه‌خۆ بۆ خه‌ڵكی كورد له‌كوردستانی ئێراندا بنێت و هه‌ر له‌ئێستاوه‌ له‌ناو جه‌ماوه‌ری خه‌ڵكدا ته‌بلیغی بۆ بكات و دژ به‌ هه‌رچه‌شنه‌ فراوانخوازیێكی شوڤینیستی ڕابوه‌ستێت. ئه‌م جۆره هه‌ڵویستگرتنه‌ پاشگه‌زبوونه‌وه‌ی دواڕۆژیان دژوارتر ده‌كات.

ده‌رهه‌ر حاڵ ئه‌وه‌یكه‌ سه‌ره‌نجام چاره‌نووسی خه‌باتی خه‌ڵكی كوردستان له‌سبه‌ی ڕۆژی سه‌ركه‌وتنی خه‌باتی سه‌راسه‌ری له‌ئێران دیاری ده‌كات هاوسه‌نگی هێزه‌ و پێوه‌ندی به‌وه‌وه‌ هه‌یه‌ كه‌ چ ڕه‌وتێك له‌تاران ده‌سه‌ڵات به‌ده‌سته‌وه‌ ده‌گرێ و خه‌باتی گه‌لی كوردیش له‌كوردستان له‌ چ بارودۆخێكدا ده‌بێت. ئه‌وه‌ی ده‌یبینین ئه‌وه‌یه‌ كه‌ به‌عزێك له‌ حیزبه‌كانی رۆژهه‌ڵات له‌گه‌ڵ شوڤینیسته‌ ئێرانییه‌كان و یان ریفورمخۆازه‌ حكومه‌تییه‌كان نزیكی ده‌كه‌ن، كه‌ ئێستا و له‌ حاڵێكدا له‌ ده‌سه‌ڵاتیش دوورن، ددان به‌ مافه‌كانی گه‌لی كورددا نانێن. به‌ نیسبه‌ت به‌راورد له‌گه‌ڵ هه‌رێمی كوردستان، ئه‌زموونی هه‌رێمی كوردستان پێمان ده‌ڵێت كه‌ گه‌لێك ده‌رفه‌تی له‌بار بۆ سه‌ربه‌خۆیی كوردستان ڕه‌خساوه‌ كه‌ له‌كاتی خۆیدا كه‌ڵكی لێ وه‌رنه‌گیراوه.‌ بۆ نموونه‌ له‌كاتێكدا كه له‌ نه‌وه‌ده‌كاندا ‌سه‌دام ده‌سه‌ڵاتی هێرشكردن بۆ سه‌ر كوردستانی باشووری نه‌بوو، له‌كاتێكدا كه ‌هه‌موو دونیا لە رژیمی به‌عس بێزار بوون و كه‌س نه‌یده‌توانی داوا له‌خه‌ڵكی كورد بكات، خۆی به‌م رژیمه‌وه‌ بلكێنێت، له‌كاتێكدا كه‌ ته‌نانه‌ت پاره‌ی هه‌رێمی كوردستان و ده‌وڵه‌تی عێراق جیاواز بوو، له‌كاتێكدا كه‌ جه‌ماوه‌ری خه‌ڵك به‌ته‌واوی پشتیوانی له‌حیزبه‌ سیاسیيه‌كانی كوردستان ده‌كردو ئه‌و كه‌لێنه‌ی كه‌ ئێستا له‌نێوان خه‌ڵك و ده‌سه‌ڵاتدا پێكهاتووه،‌ ئه‌وكات بوونی نه‌بوو. ئه‌وان نه‌ك هه‌ر هه‌وڵیان بۆ سه‌ربه‌خۆیی كوردستان نه‌دا، به‌ڵكوو خه‌ریكی شه‌ڕێكی ناوخۆی خۆیناوی بوون. مه‌رج نییه‌ ئه‌مانه‌ بكه‌ین به‌پێوانه‌ بۆ هه‌ڵسه‌نگاندنی داهاتووی ڕۆژهه‌ڵاتی كوردستان.


*  بۆچی لەناو بزووتنەوەی رزگاریخوازی كوردستاندا لەسەر ئاستی هەموو پارچەكان، پرۆژەیەكی نەتەوەیی، یان لانیكەم رێككەوتنێك لەسەر رەهەندە گشتییەكان نابیندرێ؟ بۆچی كۆنگرەی نەتەوەیی پەكی كەوت؟


** هۆكاری سه‌ره‌كیی نه‌گه‌یشتن به‌ پڕۆژه‌یه‌كی نه‌ته‌وەیی، له‌ئه‌ساسدا ئه‌وه‌یه‌ كه‌ بۆ حیزبه‌ سیاسییه‌كانی كوردستان به‌رژه‌وه‌ندی حیزبی له‌سه‌رووی به‌رژه‌وه‌ندی نه‌ته‌وه‌ییدایه.‌ پێگه‌ی كۆمه‌ڵایه‌تی ئه‌و حیزبانه‌ لاواز بووه‌وه‌و توانای چاره‌سه‌ركردنی پرسی كوردیان نه‌ماوه‌. ئه‌وان نه‌ك بۆ چاره‌سه‌ركردنی پرسی كورد، به‌ڵكوو بۆ ئه‌وه‌یكه‌  حیزبه‌كه‌ی خۆیان به‌جۆرێك له‌جۆره‌كان له‌ده‌سه‌ڵات نزیك ببێته‌وه‌، هه‌وڵده‌ده‌ن. به‌ بڕوای ئیمه‌ سه‌ره‌ڕای جیاوازی پێگه‌ و ئامانجی چینایه‌تی حیزبه‌ سیاسییه‌كان، ده‌كرێ له‌ پێناوی پووچه‌ڵكردنه‌وه‌ی پیلانی دوژمنانی خه‌لكی كوردوستان له‌ سه‌ر ئاستی هه‌موو پارچه‌كان پرۆژه‌یه‌كی گشتی هه‌بێت. كۆنگره‌ی نه‌ته‌وەیی به‌هۆی ده‌ستتێوه‌ردانی ده‌وڵه‌تانی داگیركه‌ری كوردستان و به‌هۆی پاوانخوازی ئه‌م لایه‌ن و ئه‌و لایه‌ن په‌كی كه‌وت. بنه‌مای ئاماده‌كارییه‌كان لاواز داڕێژرا. هه‌ر له‌سه‌ره‌تاوه‌ زۆربه‌ی حیزبه‌ سیاسییه‌كانی به‌شدار له‌پڕۆسه‌ی ئاماده‌كاری بۆ كۆنگره‌ لایان وابوو كه‌ نوێنه‌رانی ده‌وڵه‌تانی ده‌وروبه‌ر له‌م كونگره‌یه‌دا به‌شدار بن. ئه‌وه‌ له‌حاڵێكدایه‌ كه‌ ئه‌م كونگره‌یه‌ ڕێك له‌دژی ئه‌وان و بۆ پووچەڵكردنه‌وه‌ی پیلانه‌كانی ئه‌وان پێكده‌هات. ئه‌وه‌ ته‌نیا نموونه‌یك بوو. به‌داخه‌وه‌ گه‌لێك جار جه‌مسه‌رگیری حیزبه‌ سیاسییه‌كان له‌جیاتی ئه‌وه‌یكه‌ به‌ره‌و به‌رژه‌وه‌ندی خه‌ڵكی كورد بێت، ڕووی له‌ موجامه‌له‌ له‌گه‌ڵ ده‌وڵه‌تانی دوژمنی گه‌لی كورده‌. تا ئه‌و حیزبانه‌ له‌و دیپلۆماسییه‌ فه‌شه‌له‌ رزگاریان نه‌بێت، ئومێد ناكرێت كه‌ كونگره‌یه‌كی نه‌ته‌وەیی ڕاسته‌قینه‌ و كاریگه‌ر پێك بێت.


  * دەگوترێ باسی پێكهێنانی بەرەی كوردستانی لە رۆژهەڵاتی كوردستان بووەتە پرسێكی سەرزارەكی، لە بەر ئەوەی هەموو حزب و لایەنەكان بە دەیان جار لە بەر دەم مایكی میدیاكاندا ئامادەیی خۆیان بۆ پێكهێنانی ئەو بەرەیە دەربڕیوە، كەچی تا ئێستا وەك پراكتیك هیچ ئەنجامێكی لێ نەكەوتووەتەوە، بەڵام لەم دۆخەدا كە گۆڕانكاری جددی لە ناوچەكەدا رووی داوە و وەرچەرخانی دیكەش بەڕێوەیە، تا چەند هەوڵتان داوە پێكهێنانی بەرەی كوردستانی لە قاڵبی دروشم دەربچێ، یان وەك لایەنە سیاسییەكانی ڕۆژهەڵاتی كوردستان لانیكەم جۆرێك لە هەماهەنگی لە نێوان خۆتان دروست بكەن؟


** گرینگترین كۆسپ له‌سه‌ر رێگای پێكهاتنی به‌ره‌ی كوردستانی ڕۆحی سكتارێزمه‌ كه‌ به‌سه‌ر حیزبه‌ سیاسییه‌كانی كوردستاندا زاڵه‌. سكتارێزم واتا ‌به‌رژه‌وه‌ندی حیزب بخه‌یته‌ پێش به‌رژه‌وه‌ندی جه‌ماوه‌ره‌وه‌. كه‌م نین ئه‌و حیزبانه‌ی كه‌ به‌لایا‌نه‌وه‌ ئه‌و دوو به‌رژه‌وه‌نديیه‌ یه‌ك نییه‌. ئه‌گه‌ر جارێ له‌و حاڵه‌ته‌ وه‌ك نه‌ریتێكی زاڵ بگه‌ڕێین، هۆكاری سه‌ڕه‌كیی پێكنه‌هاتنی به‌ره،‌ جیاوازی له‌ستراتیژی سیاسیی حیزبه‌كاندایه‌.

مه‌به‌ستم له‌ستراتیژ ئه‌و ڕێگایه‌یه‌ كه‌ حیزبه‌كان پێیدا ده‌ڕۆن، نه‌ك ئامانجی دووریان و نه‌ك به‌رنامه‌یان. بۆ نموونه‌ گه‌لێك ئاساییه‌ كه‌ له‌سه‌ر به‌عزێك مافی دیموكراتیك وه‌كوو یه‌كسانی ژن و پیاو، جیایی دین له‌ده‌وڵه‌ت، ئازادییە دیموكراتیكه‌كان و هیتر، ڕێك بكه‌وێن. به‌ڵام كاتێك دێینه‌ سه‌ر ئه‌وه‌ كه‌ بۆ نموونه‌ خه‌باتی چه‌كداری چ ده‌ورێكی هه‌یه‌ و كات و شوێنی ده‌ستپێكردنی كه‌ی ده‌بێت؟ هاوپه‌یمانانی سه‌ڕاسه‌ریمان له‌ئاستی ئێران كامانەن؟ ئایا له‌هه‌ڵبژاردنه‌كانی كۆماری ئێسلامیدا به‌شداری بكه‌ین، یان نا؟‌ هه‌ڵویست به‌رانبه‌ر به‌ ڕه‌وتی به‌ناو ڕێفورمخۆاز له‌ئێران چی بێت؟ كام لایه‌نی سیاسیی كوردستانی ده‌توانن له‌م به‌ره‌یه‌دا به‌شدار بن؟ هه‌ڵویستی به‌كرده‌وه‌ به‌ڕانبه‌ر به‌ خه‌باتی گه‌لێ كورد له‌پارچه‌كانی دیكه‌ی كوردستان، بۆ نموونه‌ ئێستا له‌ڕۆژئاوا و له‌باكوور چی بێت؟ په‌یوه‌ندیی دیپلوماسی له‌گه‌ڵ ده‌وڵه‌تانی داگیرگه‌ری كوردستان و گه‌لێك پرسی دیكه‌ له‌م چه‌شنه‌، ئه‌وانه‌ هه‌ر كامه‌یان به‌نۆبه‌ی خۆیان ده‌بنه‌ ڕێگر له‌پێكهاتنی به‌ره‌. ئێمه‌ چۆن ده‌توانین له‌به‌ره‌یێكدا بێن كه‌لایه‌نێكمان خه‌رێكی گفتوگۆ له‌گه‌ڵ ئێتلاعاتی كۆماری ئێسلامی بێت، لایه‌نێكمان له ‌ڕێوڕه‌سمی ساڵیادی ئاتا توركدا به‌شداری بكات، لایه‌نێكمان خۆی به‌ته‌نیا خه‌باتی چه‌كداری ده‌ست پێ بكات و گه‌ڵێك كێشه‌ی دیكه‌ له‌م چه‌شنه‌، به‌ڵام له‌ناو به‌ره‌یێكدا بین؟  سه‌ره‌ڕای ئه‌وانه‌‌ له‌ماوه‌ی ساڵانی ڕابردوودا له‌ئاكامی جیابوونه‌وه‌كانی ناو حیزبه‌كاندا كۆمه‌ڵێك برینی ڕێكخراوه‌یی و دردۆنگی چاره‌سه‌ر نه‌كراو پێكهاتوون، كه‌ به‌نۆبه‌ی خۆیان ڕێگرن له‌ ئه‌و یه‌كگرتووییه‌. كه‌وایه‌ كۆمه‌ڵێك كێشه‌ی واقیعی هه‌ن كه‌ پێویسته‌ یه‌كه‌ به‌ یه‌كه‌ چاره‌سه‌ر بكرێن. بۆ ئه‌و مه‌به‌سته‌ له‌پرۆژه‌ی ئێمه‌دا دیالۆگ و هاوكاری دیاریكراو پێشبینی كراوه‌ و هه‌وڵیشمان بۆ داوه‌و هه‌وڵیشی بۆ ده‌ده‌ین. بێگۆمان كه‌شوهه‌وای سیاسیی ناوخۆی ئێران، كه‌شوهه‌وای سیاسیی كوردستان، ده‌توانن له‌ كاتی خۆیدا ببن به‌ فشار بۆ ئه‌وه‌یكه‌ كه‌ ئه‌م كێشانه‌ی كه‌ باس كرا، خێراتر چاره‌سه‌ر بن.


* كۆبوونەوەی هەندێ لە حزبە سیاسییەكانی ڕۆژهەڵاتی كوردستان لە پێناوی هەماهەنگی و كاری هاوبەش تا چەند پرۆسەیەكی كارایە و ئەوەش كە دەگوترێ جۆرێك لە تەریكخستن، یان نادیدەگرتنی لایەنگەلی دیكەی لێكەوتووەتەوە، تا چەند ڕاستە؟


** تائێستا به‌ڕانبه‌ر به‌ چه‌ند پرسی گرینگ كۆبوونه‌وه‌ی هاوبه‌شمان بووه‌و هه‌وڵمان داوه‌ بگه‌ین به‌ هه‌ڵویستی یه‌كگرتوو. بۆ نموونه‌ دانیشتنمان بووه‌ له‌سه‌ر سیاسه‌ت به‌ڕانبه‌ر به‌ پرسی كۆنگره‌ی نه‌ته‌وه‌یی، پرسی هه‌ڵبژاردن له‌ئێران، پرسی چاره‌سه‌ركردنی گیروگرفته‌كانمان له‌هه‌رێمی كوردستان و دیاریكردنی هه‌ئیه‌تی هاوبه‌ش بۆ گفتوگۆ له‌گه‌ڵ حكومه‌تی هه‌رێم. له‌م كۆبوونه‌وانه‌دا ئه‌ساسه‌ن ئه‌و لایه‌نانه‌ی كه‌به‌ناوی كۆمه‌ڵه‌ و به‌ناوی حیزبی دیموكراته‌وه‌ن به‌شدار بوون. جاروباریش ڕێكخراوی خه‌بات هاتۆته ‌ناو كۆبوونه‌وه‌كان. ئه‌گه‌رچی هیچكام له‌م دانیشتنانه‌ به‌ئاكامی دیاریكراوی خۆی نه‌گه‌یشتووه‌، به‌ڵام نه‌فسی كۆبوونه‌وه‌كان كه‌ درگای دیالۆگ و گفتوگۆی چه‌ند لایه‌نه‌ی كردووەتەوە، خۆی له‌خۆیدا ئێجابی بووه‌. له‌هیچكام له‌م كۆبوونه‌وانه‌دا نه‌گه‌یشتوون به‌ ڕاگه‌یاندنێكی هاوبه‌ش. بێگۆمان لایه‌نی دیكه‌ش هه‌ن كه‌ده‌یانتوانی له‌م دانیشتنانه‌دا به‌شدار بن. بۆ نموونه جێگای خۆی بوو ئه‌گه‌ر پژاكیش به‌شدار بووایه‌ت. به‌ڵام كێشه‌ ئه‌وه‌یه‌ كه‌ هه‌ر ئه‌و حیزبه‌ سیاسيیانه‌ش كه‌ باسكران، به‌پاریزه‌وه‌ به‌شداری تێیدا ده‌كه‌ن.

ئێمه‌ به‌ش به‌حالی خۆمان مه‌رجێكمان بۆ به‌شداری دانه‌ناوه‌و نه‌مانویستووه‌ لایه‌نێك په‌راویز بخرێت. ئێمه‌ بۆچوونێكمان هه‌یه‌ كه‌برێتیه‌ له‌وه‌یكه‌، كۆبونه‌وه‌كان ئامانجی دیاریكراویان هه‌بێت و ئه‌و ئامانجه‌ په‌یوه‌ندی به‌ به‌رژه‌وه‌ندییه‌كانی باڵای خه‌باتی خه‌ڵكی كوردوستانه‌وه‌ بێت، ته‌نیا كۆبوونه‌وه‌ بۆ كۆبوونه‌وه‌ نه‌بێت. سه‌رجه‌م ئێمه‌ ده‌مانهه‌وێت ئه‌و كه‌لێن و كه‌له‌به‌رانه‌ی كه‌ دۆژمن ده‌توانێ بۆ زه‌ربه‌لێدان له‌بزووتنه‌وه‌ی خه‌ڵكی كورد به‌كاریان بێنێت، له‌به‌ین به‌رين و یان به‌ لانیكه‌می خۆی بگه‌یه‌نین.


* یەكگرتنەوەی دیموكرات و كۆمەڵەكان تا چەند زەمینەی هاوكاری و خەباتی هاوبەشی گشت حزب و لایەنە سیاسییەكانی ڕۆژهەڵاتی كوردستان خۆش دەكا؟


** به‌بڕۆای من یه‌كگرتنه‌وه‌ی دیموكراته‌كان ده‌توانێت له‌ئاسۆدا بێت. چۆنكه‌ كێشه‌یه‌كی جددی به‌رنامه‌یی، ستراتیژيك و ئيدئۆلۆژێك له‌نێوانیاندا نییه‌. ئه‌وان ده‌یانتوانی و ده‌توانن یه‌ك حیزب بن. به‌ڵام بۆ ئه‌وانه‌ی كه‌ به‌ناوی كۆمه‌ڵه‌وه‌ كارده‌كه‌ن، جياوازییه‌كان جۆرێكی دیكه‌ن. ئه‌وانه‌ی كه‌ له‌ كۆمه‌ڵه‌ جيا بوونه‌وه‌، به‌به‌رنامه‌ و ئاسۆی دواڕۆژ، به‌ستراتیژی سیاسی، به‌كرده‌وه‌ و تاكتیكی سیاسی كونكرێت، حیزبگه‌ڵێكی به‌ته‌واوی جێاوازن له‌كۆمه‌ڵه‌، ئه‌گه‌رچی ناوی كۆمه‌ڵه‌یشیان هه‌ڵگرتبێت. حه‌ق وابوو ئه‌وان كه‌ ئاراسته‌ی سیاسيی خۆیان گۆڕيوه،‌ ناوی گۆنجاو له‌گه‌ڵ ئاراسته‌ی تازه‌ی خۆیان هه‌ڵبژێرن. به‌ڵام زه‌مان به‌سه‌ر جیابوونه‌وه‌كاندا هاتووه‌وه‌ و خه‌ڵكی كوردستان ئه‌و وشیارییه‌ سیاسییه‌یان په‌یدا كردووه‌ كه‌ حیزبه‌كان نه‌ك له‌ڕووی ناویان، به‌ڵكوو له‌ڕووی ناوه‌ڕۆكیان پێناسه‌ بكه‌ن.

هه‌ربۆیه‌ ئێمه‌ له‌گه‌ڵ ئه‌وه‌شدا كه‌ جه‌ره‌یانی دایك بووین كه‌ ئه‌و لایه‌نانه‌مان لێ جودا بووه‌ته‌وه‌، ئێستا ئێتر ناوێكی نه‌گۆنجاو كه ‌ئه‌وان بۆ خۆیان هه‌ڵبژاردووه‌، ناكه‌ین به‌ڕێگر له‌سه‌ر ڕێگای پێكهێنانی یه‌كپارچه‌یی به‌ڕانبه‌ر به‌ رژیمی كۆماری ئێسلامی. به‌بڕۆای ئێمه‌ ئه‌گه‌ر ئه‌و لایانانه‌ی كه‌ جیاوازییەكی بنه‌ڕه‌تییان له‌گه‌ڵ یه‌ك نییه‌ و سه‌رچاوه‌ی به‌رنامه‌ و ئیدئۆلۆژی و ستراتیژییان یه‌كه‌، یه‌ك بگرنه‌وه،‌ ده‌توانێ بۆ ئه‌و مه‌به‌سته‌ی كه‌ باستان كرد، كارئاسانی بكات.


* ئەمریكا و وڵاتانی رۆژئاوا دەمێكە دۆسیێ ناوكی، پرسی دیموكراسی و فایل و ڕاپۆرتەكانی مافی مرۆڤ لە دژی كۆماری ئیسلامی ئێران دەجووڵێنن، تا چەند بەوە گەشبینن كە ئەو فشارانە ئەگەری ریفۆرم لەو وڵاتەدا بڕەخسێنێ و ئایا تا ئێستا كاریگەرییەكی ئەرێنی هەبووە؟


** ئه‌ساسی ئه‌و فشارانه‌ ڕووی له‌گۆڕێنی رژیمی كۆماری ئێسلامی نییه‌ و نه‌بووه‌. جیهه‌تی ئه‌و فشارانه له‌ئه‌ساسدا ته‌نانه‌ت دیموكراسی و مافی مرۆڤیش نه‌بووه‌. ئامانجی سیاسه‌تی ئامریكا و ده‌وڵه‌تانی ڕۆژئاوا ئه‌وه‌ بووه‌ و ئه‌وه‌یه‌ كه‌ رژیمی كۆماری ئێسلامی له‌رژیمێكی نه‌یار و سه‌ركه‌شه‌وه‌ بكه‌ن به‌ رژیمێكی هاوكار له‌ناوچه‌كه‌دا. ئامانج ئه‌وه‌یه‌ كه‌ پێش به‌ زیادەخوازییه‌كانی كۆماری ئێسلامی بگرن و بیكه‌ن به‌رژیمێك كه‌ هاوكاریان بێ له‌ چاره‌سه‌ركردنی كێشه‌كانی ناوچه‌كه‌ و شه‌ریكێكی بازرگانی و سه‌رمایه‌گوزاری ڕێكوپێكی ئه‌وان بێت. ده‌رگای بازاڕی كالا و سه‌رمایه‌ به‌ره‌ورووی وڵاتانی رۆژئاوا بكرێته‌وه‌. له‌گه‌ڵ ئه‌وه‌شدا كه‌ ئێمه‌ به‌گه‌ڵێك هۆكاری بابه‌تی بزووتنه‌وه‌ی سه‌وز له‌ئێران به‌ حه‌ره‌كەیێكی ڕه‌سه‌نی ڕێفورمخۆاز نازانین، به‌ڵام ئه‌گه‌ر له‌بیرتان بێت له‌ساڵی 1388 كه‌ ئه‌و حه‌ڕه‌كه‌یه‌ له‌ئێران كه‌وته‌ڕێ، ده‌وڵه‌تی ئامریكا به ‌ڕاشكاوی پشتیوانی لێ نه‌كرد، چۆنكه‌ نه‌یده‌ویست بناغه‌ی په‌یوه‌ندییه‌كانی خۆی له‌گه‌ڵ باڵی ده‌سه‌ڵاتداردا تێك بدات. له‌بیرمانه‌ كه‌ خه‌ڵك له‌تاران درۆشمیان ده‌دا: "ئۆباما، ئۆباما، یا با اونها، یا با ما"، كه‌ ئه‌وه‌ ته‌عبیری له‌ سیاسه‌تی واقیعی ده‌وڵه‌تی ئامریكا ده‌كرد.

له‌جه‌ره‌یانی ڕێككه‌وتنه‌كانی ناو‌كیدا ئه‌گه‌رچی له‌وانه‌یه‌ ڕاسته‌وخۆ باس له‌ كێشه‌ ناوچه‌ییه‌كانی وه‌كوو سووریه‌ و عێراق و فه‌له‌ستین و یه‌مه‌ن و شوێنه‌كانی دیكه‌ نه‌كرابێت، به‌ڵام بۆ ده‌وڵه‌تی ئامریكا ته‌نیا زه‌مانه‌ت بۆ به‌ڕێوەچوونی به‌كرده‌وه‌ی ئه‌م رێككه‌وتنه‌، گۆڕانی هاوسه‌نگیی هێز بوو به‌ قازانجی باڵی میانه‌ڕه‌و له‌ ناو رژیمی ئێراندا. ئامریكا و ده‌وڵه‌تانی ڕۆژئاوا ئه‌وه‌نده‌ خاو نه‌بوون كه‌ توانای ئابووریی كۆماری ئێسلامی بگه‌یه‌نن به‌ڕاده‌یه‌ك كه‌ ده‌ست و باڵی له‌ ده‌ستتێوه‌ردان له‌ كێشه‌كانی ناوچه‌كه‌دا كراوه‌تر بێت. هه‌ر بۆیه‌ باڵی تۆندڕه‌و كه‌هه‌ستی به‌و سیاسه‌ته‌ كردبوو، به‌كرده‌وه‌ ڕێگای نه‌دا كه‌ ئه‌و هاوسه‌نگییه‌ بگۆڕێت. دڵنیاش بن له‌وه‌یكه‌ ئه‌وه‌نده‌ی كه‌ به ‌باڵی میانه‌ڕه‌و مه‌ربووت بێت، هیچ رووناكاییه‌كیان بۆ مافی گه‌لی كورد و بۆ مافی مرۆڤ  له‌ئێران تێدا به‌دی ناكرێت. ته‌نانه‌ت ئه‌وه‌یكه‌ موسەوی و كەهروبی كه‌ ده‌كه‌ونه‌ لایه‌نی چه‌پی رۆحانی، ئامانجی خۆیان به‌ "گه‌ڕانه‌وه‌ بۆ ڕۆژگاری زێڕینی سه‌رده‌می خومەینی" دیاری كردبوو. ئه‌وه‌ی وتم درۆشمی خۆیان بوو.


* ئەی وڵاتاتی ڕۆژئاوا و بەتایبەتی ئەمریكا بۆچی بە سیاسەتی نەرم لەگەڵ ئێران مامەڵە دەكەن؟


** بۆ ئه‌وه‌یكه ئێران له‌ڕووی به‌رژه‌وه‌ندییه‌كانی باڵا و دڕێژخایه‌نی ئه‌مریكا و ده‌وڵه‌تانی ڕۆژئاوا، وڵاتێكی گرینگه‌. هه‌ر گۆڕانكارییەكی ئه‌ساسی به‌باری سه‌لبی، یان ئێجابیدا له‌ ئیران ڕووبدات، كاریگه‌ری جددی له‌سه‌ر هه‌موو ناوچه‌كه‌ داده‌نێت، هه‌ر وه‌كوو چۆن ڕووخانی رژیمی شا و هاتنه‌سه‌ركاری كۆماری ئێسلامی ئه‌م كاریگه‌رییه‌ی دانا. ده‌وڵه‌تانی ڕۆژئاوایی نایانهه‌وێت كۆمه‌ڵگەی ئێران بكه‌وێته‌ سه‌ر ڕه‌وتێك كه‌ یان نه‌زانن به‌ره‌و كۆی ده‌چێت و یان بزانن به‌ره‌و مه‌سیرێك ده‌ڕۆات كه‌ له‌به‌رژه‌وه‌ندی ئه‌واندا نییه‌. هه‌ر بۆیه‌ گه‌لێك به‌پارێزه‌وه‌ له‌گه‌ڵ ئێران مامه‌ڵه‌ ده‌كه‌ن.


*  دواپرسیارمان با گریمانەی ئەوە بێ، كۆماری ئیسلامی ئێران داوای وتووێژ و چارەسەری ئاشتییانەی كێشەی كورد لە ئێران بكا، ئەگەر وەك رێكخراوێكی ڕێپێدراو مافی چالاكیی سیاسی و مەدەنیتان لە رۆژهەڵاتی كوردستان پێ بدرێ، چۆن مامەڵە لەگەڵ ئەو پێشنیارەدا دەكەن و تا چەند ئەو ئەگەرە بە شتێكی مەحاڵ دەزانن؟

 

 ** به‌ بۆچوونی ئێمه‌ گفتوگۆ له‌گه‌ڵ دڕنده‌ترین و گه‌ندەڵترین رژیمێك، ده‌توانێ به‌شێك له‌خه‌بات بێت له‌گه‌ڵ ئه‌و رژیمه‌. كه‌وایه‌ ئێمه‌ له‌ڕووی ئوسوولییه‌وه‌ گفتوگۆ له‌گه‌ڵ دوژمن، به‌ كۆماری ئیسلامیشه‌وه‌، له‌ رووی تیۆرییه‌وه‌ ره‌ت ناكه‌ینه‌وه‌، به‌ڵام گفتوگۆ له‌ئاكامی هاوسه‌نگیی هێز دێته‌كایه‌وه‌. ساڵی 1980 كه‌ئێمه‌ له‌چوارچیوه‌ی هه‌یئه‌تی نوێنه‌رایه‌تی گه‌لی كورددا كه‌ له‌هه‌موو هێزه‌كانی چالاك له‌كوردستان پێكهاتبوو، گفتوگۆمان له‌گه‌ڵ كۆماری ئێسلامی ده‌ست پێ كرد، ئه‌وه‌ هاوسه‌نگی هێزی دوولایه‌ن بوو كه‌ مه‌جالی ئه‌و گفتوگۆیه‌ی ڕه‌خساند. دوای ئه‌وه‌ هه‌ر گفتوگۆێك له‌لایه‌ن هه‌ر حیزبێكه‌وه‌ كه‌ له‌گه‌ڵ كۆماری ئێسلامی كرابێت، ته‌نیا و ته‌نیا ده‌چێته‌ خانه‌ی پیلانگێڕییه‌وه‌، ده‌چێته‌ خانه‌ی كارێكی ئیتلاعاتی و موخابه‌راتییه‌وه‌. گفتوگۆ له‌گه‌ڵ كۆماری ئێسلامی نه‌ ده‌توانێت به‌فه‌رزی گۆڕانی ناوه‌ڕۆكی ئه‌و رژیمه‌ بێت و نه‌ ده‌توانێت به‌فه‌رزی ئه‌وه‌ بێت كه‌ گۆیا ده‌توانین له‌ڕێی دیپلۆماسی و گفتوگۆ‌وه‌ ئه‌وه‌یكه‌ له‌مه‌یدانی واقعی خه‌بات و نه‌به‌رددا به‌ده‌ستمان نه‌هێناوه‌، ته‌نیا له‌گفتوگۆدا به‌ده‌ستی بێنین.

گفتوگۆ ئه‌و هاوسه‌نگییه‌ سه‌قامگیر ده‌كات كه‌ له‌ نه‌بردی ده‌ره‌وه‌ی ساڵۆنه‌كانی گفتوگۆدا پێكهاتبێت. به‌پێی ئه‌وانه‌ی كه‌ باسم كرد له‌ئێستادا ئێمه‌ ده‌ستپێكردنی وه‌ها گفتوگۆیەك به‌مه‌حاڵ ده‌زانین. به‌ڵام پێم خۆشه‌ وه‌كوو سه‌ره‌تایێك ئه‌وه‌ دووپات بكه‌مه‌وه‌ كه‌ گفتوگۆ له‌گه‌ڵ كۆماری ئێسلامی له‌سه‌ر مافه‌كانی گه‌ڵی كورد، مه‌سه‌له‌ی ئه‌م حیزب و ئه‌و حیزب نییه‌، به‌ڵكوو مه‌سه‌له‌ی هه‌موو خه‌ڵكی كوردستانه‌. له‌بارودۆخی ئێستادا كه‌ خه‌ڵكی كورد مه‌جالی هه‌ڵبژاردنی نوێنه‌رانی خۆی نییه‌، ده‌توانێ نوێنه‌رانی هه‌موو حیزبه‌ سیاسییه‌كانی هه‌ڵسووڕاو له‌كوردستان، بۆ ماوه‌یه‌ك ئه‌و بۆشاییه‌ پڕبكه‌نه‌وه‌و سبه‌ی رۆژیش ته‌ره‌فی گفتوگۆ نوێنه‌رانی هه‌ڵبژێردراوی شوراكانی جه‌ماوه‌ری خه‌ڵك بن. هه‌ربۆیه‌ ئێمه‌ هه‌رچه‌شنه‌ دانیشتنێكی جیاوازی ئه‌م حیزب و ئه‌و حیزب له‌گه‌ڵ كۆماری ئێسلامی وه‌كوو گفتوگۆ بۆ مافه‌كانی گه‌لی كورد به ‌ڕه‌سمی ناناسین و به‌ به‌شێك له‌پیلان و دووبه‌ره‌كی نانه‌وه‌ی رژیمی ئێرانی ‌ده‌زانین.

 

 

**************************************

 

vokradio.jpg

 Voice of Kurdish-American Radio for Democracy, Peace, and Freedom

 
free stats

 

 

 
< بعد   قبل >
© 2007 - 1396, VOK Radio