Iranian Culture & Art Club of Fresno
رادیو ده نگی کوردستان له ئامریکا

VOK Radio Newsletter

Name: 
Email:  
Subscribe Unsubscribe

Calendar of Events

« < November 2017 > »
M T W T F S S
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3
Home arrow هه‌رێمه كوردییه‌‌كان arrow زنجیرە وتووێژێك لەگەڵ ١٢حيزب و لایەنی سیاسیی ڕۆژهەڵات: پارتی سەربەستیی کوردستان
زنجیرە وتووێژێك لەگەڵ ١٢حيزب و لایەنی سیاسیی ڕۆژهەڵات: پارتی سەربەستیی کوردستان چاپ ارسال به دوست
سالار حیسامی vokradio, Los Angeles, California, USA   

زنجیرە وتووێژێك لەگەڵ ١٢حيزب و لایەنی سیاسیی ڕۆژهەڵاتی كوردستان

 

به شى سيهه م: پارتی سەربەستیی کوردستان

kurdish_united_front_03.jpg

 

 عارف باوەجانی سەرۆکی پارتی سەربەستیی کوردستان

پيشه كى:

ئاماده كارى و سه رپه ره شتى وتوويژه كان: سالار حیسامی


ڕادیۆ دەنگی كوردستان لە ئەمریكا، زنجیرە وتووێژێكی لەگەڵ دوازدە حيزب و لایەنی سیاسیی ڕۆژهەڵاتی كوردستان لەبارەی رەوتی گۆڕانكارییەكان لەڕۆژهەڵاتی ناوەڕاست و هاوكێشە سیاسییەكانی ناوچەكەو جیهان و كاردانەوەیان لەسەر ئێران، هەروەها سەرهەڵدانەوەی خەباتی چەكداری لە رۆژهەڵاتی كوردستان و پێگەی كورد لە هەنگاونانی بەرەو سەربەخۆیی و چەند تەوەرێكی دیكە ئەنجام داوە، كە لەماڵپەڕی ڕادیۆ دەنگی كوردستان لەئەمریكا، (بەڕەچاوكردنی پێوەری بێلایەنی پیشەیی) بەپێی پیتی(ئەلف بێ)ی ناوی حيزبە بەشداربووەكان بڵاودەكرێنەوە، هەر لایەنێكیش دواتر وەڵامی پرسیارەكان بداتەوە، هەر لە ریزی ئەو زنجیرە وتووێژەدا دادەنرێ.

پێویستە خوێنەرانی بەڕێز ئاگادار بكەینەوە كە ئەم زنجیرە وتووێژە لەپێش بەڕێوەچوونی شەشەمین دیداری ئەنیستیتوتی رۆژهەڵاتی ناوەڕاست بۆ توێژینەوە(مێری) لەهەولێر ئەنجام دراوەو ئەو لایەنانەش كە لەو پانێلانەدا بەشدار نەبوون، لەم زنجیرە وتووێژەدا بەشدار كراون.

 

iranian_kurds_12organizations.jpg

 

 

بێگومان ڕۆژهەڵاتی ناوەڕاست لەدۆخێکی ئاڵۆزو پڕكێشەی ئەوتۆدایە كە ئەگەری گۆڕانکاری لەئایندەی ناوچەكەدا پتربووە، ئەوەش نكۆڵی لێ ناكرێ كە ملمڵانێی ناڕەوای ئایینی و مەزهەبی بووەتە هۆی پەرەسەندنی توندڕەوەی و تیرۆریزم، بەجۆرێك كە دەرگای بۆ دەستوەردانی دەرەكی لەئاستی وڵاتانی ناوچەیی و زلهێزانی جیهاندا كردووەتەوە، كوردیش لەو گۆڕانكارییانەدا پشكی شێری بەردەكەوێ. بۆیە بەلەبەرچاوگرتنی هەوڵدان بۆ یەكڕیزی لەپێناوی بەرژەوەندیی باڵای نەتەوەیی، تەوەری سەرەكیی وتووێژەكانمان لەبارەی زەروورەتی پێكهێنانی بەرە، یان هێزێكی هاوبەش و هەماهەنگیكار بووە بۆ ڕۆژهەڵاتی كوردستان و هەوڵدراوە كۆسپەكانی بەردەم ئەو هەنگاوە پێویستە تاوتوێ بكرێ. لەوانەشە زۆر كەس گەورەیی و مێژووی ڕابردووی خەبات و قوربانیدانی لایەنەكان بەلایانەوە پێوەر بێ، ئێمەش وەك چاودێر و میدیاكار، شرۆڤەی تایبەت و بابەتییانەمان بۆ قورسایی هەر لایەنێك هەیە، بەڵام ئەركی پیشەیی ناچارمان دەكا، هیچ لایەن و حزبێ نادیدە نەگرین، ئەوەشی وا دوابڕیاردەرە كە كام لایەن جەماوەریترە، ئیرادەی گەلی كوردستانەو ئەو بڕیارە بۆ هاووڵاتییانی كوردستانی بەجێدەهێڵین.

هیوادارین ئەركی خۆمان وەك میدیاكاری بێلایەن بەباشی جێبەجێ كردبێ.

 

ریزبەندیی بەشداربووانی بەڕێز:

 

  

 

 

١- بزووتنەوەی کۆماریخوازانی رۆژهەڵاتی کوردستان
٢- پارتی ئازادیی كوردستان
٣-پارتی ژیانی ئازادی كوردستان '
٤- پارتی سەربەستیی کوردستان
٥- پارتی لیبڕاڵ دیموكراتی كوردستان
٦-حيزبی دیموكراتی كوردستان (هێشتا وەڵامی نەداوەتەوە)
٧-حيزبی دیموكراتی كوردستانی ئێران(هێشتا وەڵامی نەداوەتەوە)
٨- رێكخراوی كوردستانی حزبی‌ كۆمۆنیستی‌ ئێران- كۆمەڵە
٩- سازمانی خەباتی كوردستانی ئێران
١٠- كۆمەڵەی زەحمەتكێشانی كوردستان
١١-کۆمەڵەی زەحمەتکێشانی کوردسـتانی ئێران (هێشتا وەڵامی نەداوەتەوە)
١٢- یەكێتی شۆڕشگێڕانی كوردستان 

 

به شى سيهه م: پارتی سەربەستیی کوردستان

 عارف باوەجانی سەرۆکی پارتی سەربەستیی کوردستان

ديمانە: سالار حیسامی

*پرسیاری یەكەممان با ئەوە بێت، ماوەیەكە لە ڕۆژهەڵاتی كوردستان خەباتی چەكداری سەری هەڵداوەتەوە و ئەو شێوازی خەباتەش خوێندنەوەى جیاوازی بۆ دەكرێ، بەتایبەتی لەم دۆخەدا كە ڕۆژهەڵاتی ناوین بەرەو گۆڕانكاریى ژیوپۆلۆتیكی هەنگاو هەڵدەگرێ، هەڵوێستی ئێوە لەو بارەیەوە چییە؟
 

** ئەوەی من تێيگەیشتووم، هەندێک لە هێزەکانی ڕۆژهەڵاتی کوردستان هێزەکانی پێشمەرگەیان ناردووەتەوە ناو ڕۆژهەڵاتی کوردستان نەک بە مەبەستی شەڕکردن لەگەڵ هێزەکانی کۆماری ئیسلامی ئێران، بگرە بە مەبەستی خەباتی ڕێکخستن و دیدار لەگەڵ خەڵکدا، بەڵام لەو گەشتە سیاسی و ڕێکخستنانەشدا دەکەونە کەمینی هێزەکانی کۆماری ئیسلامی ئێران و بەرگری لە خۆیان دەکەن. بێگومان لەبەر پاراستنی دەستکەوت و بەرژەوەندییەکانی حکومەتی هەرێمی کوردستان ماوەیەکی زۆرە حزبەکانی ڕۆژهەڵاتی کوردستان بە شێوەی حزووری لە ڕۆژهەڵات دابڕابوون، هەر بۆیەش من ئەو هەنگاوە بە هەنگاوێکی دروست و گونجاو دەزانم. من پێموایە لەم سەردەمەدا کە گۆڕانکاری لە ناوچەکان خەریکە دروست دەبێت، پێویستە لایەنە سیاسيیەکانی ڕۆژهەڵاتی کوردستان توانایی و ئامادەیی خۆیان پێشان بدەن، بەگشتی من گەڕانەوەی هێزە سیاسءیەکانی کوردستان بۆ ناو ڕۆژهەڵاتی کوردستان بە یاسایی و ڕەوای دەبینم.
 

* ڕایەك هەیە پێداگری لەوە دەكا، كە لە بەشێكی باشووری كوردستان جۆرێك لە سانسۆری هەواڵەكانی ڕۆژهەڵاتی كوردستان بەدی دەكرێ، لە بەشێكی دیكەشی بایەخی تەواوی پێ دەدەن، چ خوێندنەوەیەكتان بۆ ئەو ڕایە هەیە؟


** بەڵێ، بەداخەوە هیندێک لە ڕاگەیاندنەکان زۆر بێدەنگی لە ئاست هەواڵ و سەرکەوتنەکانی ڕۆژهەڵاتی کوردستان هەڵدەبژێرن.  هۆکارەکەشی بۆ نفووز و دەسەڵاتی کۆماری ئیسلامی ئێران لە سەر ئەو ڕاگەیاندنانە دەگەڕێتەوە.


*: پێوەندییەكانی كوردی ڕۆژهەڵاتی كوردستان و ئۆپۆزیسیۆنی ئێرانی چۆنە و ئایا ئەو ئەزموونەی باشووری كوردستانتان لەبەرچاو گرتووە كە كاتی خۆی لەگەڵ حزبە عێراقییەكان لە دژی حكومەتی بەعس لە بەرەیەكدا بوون و ئێستا هەر ئەوان بودجە و مووچەی خەڵكی كوردستانیان بڕیوە؟


** پێوەندییەکان لە دوو بەشدا خۆیان دەبیننەوە، یەکەم: پێوەندی لەگەڵ لایەنەکانی نەتەوەکانی بندەست لە ئێراندا، کە بریتین لە نەتەوەکانی عەرەبی ئەحواز، بەلوچ، تورکمەنستان و تورکی ئازەری و هیندێک کەمینەی دیکەش، ئەمانە نەتەوەی بندەستن و وەک ئێمەی کورد لە ژێر ستەمی دەسەڵاتی داگیرکاری کۆماری ئیسلامی ئێرانی دەچەوسێنەوە. دووەم: پێوەندی لەگەڵ ئۆپۆزيسیۆنی ئێرانیيە، واتە ئەو حزبە ئێرانیيانە کە خۆیان بە حزبی پاراستنی یەکپارچەیی ئێران دەزانن و زۆربەیان پان ئێران خواستن، ئەمانە لە بەرنامەو پڕۆگرامیاندا نییە کە دان بە مافی چارەنووسی گەلی کورد و هیچ نەتەوەیەکی دیکەش لە ناوچەکەدا بنێن. کەوابێت چۆن دەتوانین لەگەڵیان پێوەندی هاوبەشمان هەبێت.

ئەگەر هیندێک لەوان ئیستا لە تاڕاوگە تۆزێک نەرمی لە خۆیان نیشاندەدەن، یا وەک نموونەیەک باس لە مافی خودموختاری دەكەن، بەدڵنیايیەوە بچنە سەر حوکم زۆر لە کۆماری ئیسلامی توندتر دەبن لە بەرامبەر  ویستی مافی گەلی کوردا. هەروەک لە پرسیارەکەی بەڕێزیشتاندا هاتووە کە نموونەی زۆرە لەو حزبانەی کە کاتێک لە هەولێر و سلێمانی بوون، بە قسە دانیان بە هەموو مافێکی کورددا دەنا، بەڵام کە چوونەوە بەغدا لە هەموو قسەو بەڵێنییەکی خۆیان پەشیمان بوونەوە. هەر بۆیە ێێمە پێمانوایە کە لایەنە سیاسیيەکانی ڕۆژهەڵاتی کوردستان دەبێت زۆر بە وردبینیيەوە بچنە ناو پرۆسەی دۆستایەتی لەگەڵ لایەنە سەرتاسەری خوازەکانی ئێرانی.


* بۆچی لەناو بزووتنەوەی ڕزگاریخوازی كوردستاندا لەسەر ئاستی هەموو پارچەكان، پڕۆژەیەكی نەتەوەیی، یان لانیكەم رێككەوتنێك لەسەر رەهەندە گشتییەكان نابیندرێ و بۆچی كۆنگرەی نەتەوەیی پەكی كەوت؟


** زۆر جار هەوڵدراوە ئەو پڕۆژە نەتەوەییە دروست بکرێت و کاری زۆریشی بۆ کراوە، بەڵام نەیاران و داگیرکەرانی کوردستان هەنگاوی زۆریان ناوە بۆ ڕێگریکردن و بەربەست دروستکردن لەو بوارەدا، کە لە سەرەوەی هەموویان کۆماری ئیسلامی ئێران دەورێکی سەرەکی هەیە لەو بوارەدا. منیش دەڵێم ناوچەکە بەرەو گۆڕان دەچێت و پێویستە ناوەندێکی بڕیاردانی نەتەوەیی بۆ کوردستانی مەزن دروست بکرێت، كە وەڵامدەری ئەگەرەکانی گۆڕانکاری لە ناوچەکەدا بێت.


* دەگوترێ باسی پێكهێنانی بەرەی كوردستانی لە ڕۆژهەڵاتی كوردستان بووەتە پرسێكی سەرزارەكی، لە بەر ئەوەی هەموو حزب و لایەنەكان بە دەیان جار لە بەر دەم مایكی میدیاكاندا ئامادەیی خۆیان بۆ پێكهێنانی ئەو بەرەیە دەربڕیوە، كەچی تا ئێستا وەك پراكتیك هیچ ئەنجامێكی لێ نەكەوتووەتەوە، بەڵام لەم دۆخەدا كە گۆڕانكاری جددی لە ناوچەكەدا رووی داوە و وەرچەرخانی دیكەش بەڕێوەیە، تا چەند هەوڵتان داوە پێكهێنانی بەرەی كوردستانی لە قاڵبی دروشم دەربچێ، یان وەك لایەنە سیاسییەكانی ڕۆژهەڵاتی كوردستان لانیكەم جۆرێك لە هەماهەنگی لە نێوان خۆتان دروست بكەن؟
 

** منیش پێموایە زۆربەی حزبەکان لە ڕاگەیاندن و لێدواندا ئامادەیی تەواو  پێشاندەدەن لە دروستبوونی بەرەدا، بەڵام لە کاتی کرداردا دەیان بڕوبیانوو بۆ یەک دێننەوە. زۆر کۆسپ و هۆکار دروستکراون، کە ڕێگرن لە دروستبوونی بەرەیەکی هەنووکەیی بۆ ڕۆژهەڵاتی کوردستان و هەنگاوێک زیاتر دووری خستووینەتەوە، نموونەش دابەشبوونی هیندێک لە حزبەکانی ڕۆژهەڵاتی کوردستانە بۆ دوو بەش و سێ بەش، ئێمە هیچکات دژ یا کۆسپ نەبووین بۆ دروستبوونی بەرە، لە هیچ لایەنێک جیانەبووینەتەوە، تا لایەنی دیکە دژمان بوەستێتەوە، بگرە زۆر بانگەواز و پشتیوانمان بۆ دروستبوونی پێشانداوە، چەندین جار ئامادەیی خۆمان نێشانداوە لەوەی کە لە ئوروپا ئامادەین پێشوازی لە نۆێنەری هەموو لایەنەکان بکەین، بۆ بەڕێوەچوونی کۆبوونەوەی باس و خواست لەو بوارەدا. لێرەشەوە دووبارەی دەکەینەوە کە پارتی سەربەستیی کوردستان بەو پەڕی دڵسۆزییەوە ئامادەیی بە کردەوە بۆ ئەو هەنگاوە پێشان دەدەین، دروستبوونی بەرەیەک بۆ ڕۆژهەڵاتی کوردستان، بە یەکێک لە ئەرکە گرنگ و زەروورەکانی هەنووکەی کوردستان دەزانێن.


* كۆبوونەوەی هەندێ لە حزبە سیاسییەكانی ڕۆژهەڵاتی كوردستان لە پێناوی هەماهەنگی و كاری هاوبەش تا چەند پرۆسەیەكی كارایە و ئەوەش كە دەگوترێ جۆرێك لە تەریكخستن، یان نادیدەگرتنی لایەنگەلی دیكەی لێكەوتووەتەوە، تا چەند ڕاستە؟


**  لەو ماوەیەدا بیستمان کە چەند حزبێک لە حزبەکانی ڕۆژهەڵاتی کوردستان کە هیندێک خاڵی هاوبەشیان بووە، کۆبوونەتەوە، من لەگەڵ بەرپرسی یەکێک لە لایەنەکانی ڕێکخەری ئەو کۆبوونەوانە پێوەندیم گرت، وەڵامی ئەوەم دەستکەوت کە گوایا ئەوان ئەو لایەنانەن داوایان لێکراوە کە هێزەکانیان لە ڕۆژهەڵات بکشێنەوەو لەو بوارەوە قسەیان کردووە، ئەگەر کۆبوونەوەکانیان درێژە بکێشێت، ئەوا لایەنی دیکەش بانگهێشت دەکەن.
 

* یەكگرتنەوەی دیموكرات و كۆمەڵەكان تا چەند زەمینەی هاوكاری و خەباتی هاوبەشی گشت حزب و لایەنە سیاسییەكانی ڕۆژهەڵاتی كوردستان خۆش دەكا؟


** یەكگرتنەوەی دیموكرات و كۆمەڵەكان لە زۆر بواردا هاوکار دەبێت، بەتایبەت گەورەترین ڕێگەخۆشکەر دەبێت بۆ دروستکردنی بەرەیەکی سیاسی بۆ ڕۆژهەڵاتی کوردستان.
 

* ئەمریكا و وڵاتانی ڕۆژئاوا دەمێكە دۆسیێ ناوكی، پرسی دیموكراسی و فایل و ڕاپۆرتەكانی مافی مرۆڤ لە دژی كۆماری ئیسلامی ئێران دەجووڵێنن، تا چەند بەوە گەشبینن كە ئەو فشارانە ئەگەری ریفۆرم لەو وڵاتەدا بڕەخسێنێ و ئایا تا ئێستا كاریگەرییەكی ئەرێنی هەبووە
؟


** لە ساڵی١٩٧٩ تا ئیستا بە ڕاپۆرتی ساڵانەو مانگانەی ڕێکخراوەکانی چاودێری مافی مرۆڤ کۆماری ئیسلامی ئێران مەحکوم دەکرێت بە پێشێلکاری مافی مرۆڤ، بەڵام هیچ گۆڕانکارییەکی لەو رێژیمە دروست نەکردووە و بگرە ساڵ بە ساڵ زیاتر خراپتر دەبێت. من پێموایە باشترین هەنگاو بۆ سەقامگیری ئاشتی و ئارامی لە ڕۆژهەڵاتی ناوەڕاست کارکردنە بۆ ڕووخاندنی رێژیمى دیکتاتۆيی کۆماری ئیسلامی ئێران.
 

*: كەواتە وڵاتاتی ڕۆژئاوا و بەتایبەتی ئەمریكا بۆچی بە سیاسەتی نەرم لەگەڵ ئێران مامەڵە دەكەن؟
 

** دەکرێت بڵێین بەداخەوە ئیدارەی ئۆباما زۆر بە نەرمی لەگەڵ ئێران مامەڵەی کرد، ئەو نەرميیەش وای لە ئێران کرد کە زیاتر لەخۆبایی بێت و خۆی بە سەرکەوتوو بزانێ لە ئاست جیهاندا، بەڵام بە دڵنیاییەوە  لە ئەگەری هاتنە سەرکاری کۆماریخوازەکان لە ئەمریکادا گۆڕانکاری لە سیاسەتی ئەمریکا بەرامبەر بە ئێران دەکرێت، ئەو گۆڕانکاریيەش دەتوانێ کاریگەری لەسەر وڵاتانی ئوروپا هەبێت.
 

* دواپرسیارمان با گریمانەی ئەوە بێ، كۆماری ئیسلامی ئێران داوای وتووێژ و چارەسەری ئاشتییانەی كێشەی كورد لە ئێران بكا، ئەگەر وەك رێكخراوێكی ڕێپێدراو مافی چالاكیی سیاسی و مەدەنیتان لە ڕۆژهەڵاتی كوردستان پێ بدرێ، چۆن مامەڵە لەگەڵ ئەو پێشنیارەدا دەكەن و تا چەند ئەو ئەگەرە بە شتێكی مەحاڵ دەزانن؟
 

** تا ئەوەی ئێمە لە کۆماری ئیسلامی ئێران حاڵی بووبین، ئەوە شتێکی مەحاڵە، هەرگیز نیيەتپاکی لە کۆماری ئیسلامی ئێران بۆ مەسەلەی ئاشتی لەگەڵ گەلی کورد ناوەشێتەوە، چونكە ئەگەر باس لە ئاشتی و وتووێژ بکرێت، دەبێت باس لە دابینکردنی مافەکانی گەلی کورد و نەتەوەکانی دیکە بکرێت، کە ئەوانیش هەرگیز ئامادەی ئەوە نابن، سیستەمی ویلایەتی فەقێ یانی سیستەمی دژی دیمۆکراتی و مافی مرۆڤ. 



 

**************************************

 

vokradio.jpg

 Voice of Kurdish-American Radio for Democracy, Peace, and Freedom

 
free stats

 

 

 
< بعد   قبل >
© 2007 - 1396, VOK Radio